SQO-da sanıtar dárigerler teksergen oıynshyqtardyń 61 paıyzy talapqa saı bolmaı shyqty
PETROPAVL. QazAqparat – Soltústik Qazaqstan oblysynda sanıtar dárigerler jyl basynan beri oıynshyqtardyń 82 synamasyn tekserse, sonyń 50-i túrli kórsetkishter boıynsha talapqa saı kelmegen, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, jyl basynan mamandar balalar oıynshyqtarynyń 82 synamasyn tekserdi. Olardyń 50-i, ıaǵnı 60,97 %-y tehnıkalyq reglamentterdiń talaptaryna sáıkes kelmegen. Sonyń ishinde úlgilerdiń 86,2 %-y tańbalaý boıynsha jáne 13,7 %-y sanıtarııalyq-hımııalyq kórsetkishter boıynsha.
«Taldaý júrgizdik, naryqtaǵy talapqa sáıkes kelmeıtin ónimniń 28 %-y EAEO kiretin memleketterden jetkizilse, qalǵan 72 %-y basqa ımporttaýshy elderden jetkizilgen. Sonyń ishinde eń úlken úles Qytaıǵa tıesili - 40 %, Reseı Federatsııasy – 26 %, Ózbekstan – 12 %, Ulybrıtanııa – 6 %, Japonııa – 2 % jáne shyqqan jeri belgisiz ónimder – 14 %.
Zań buzýshylyqtar negizinen tańbalaýǵa qatysty, kóbinese óndirýshiniń ataýy men ornalasqan jeri, ımporttaýshy, onymen baılanysýǵa arnalǵan aqparat, shyǵarylǵan kúni, EAEO belgisi, tańbalaý jáne oıynshyqpen birge orys jáne memlekettik tilderde berilgen tehnıkalyq qujattama bolmaıdy», - deıdi SQO sanıtarııalyq-epıdemıologııalyq baqylaý departamentiniń tehnıkalyq reglamentterdiń talaptaryn baqylaý bóliminiń bas mamany Ádil Qurǵynbaev.
Ónim qaýipsizdigi monıtorınginiń qorytyndysy boıynsha sáıkes kelmeıtin ónimderge qatysty ony satýshylarǵa zańbuzýshylyqtardy joıý týraly uıǵarymdar berilgen. Sondaı-aq sharalar qabyldaý úshin sanıtarııalyq-epıdemıologııalyq baqylaý komıtetine hattar jiberildi.
«Balalarǵa arnalǵan taýarlardy satyp almas buryn, tańbalaýyna asa mán berý qajet. Ol jerde ónimniń tolyq sıpattamasy bolýy tıis. Esińizde bolsyn, zııandy zattar shamaly asyp ketse de ýlanýǵa ákep soqtyrady. Sondyqtan ata-analar satýshylardan ónim sertıfıkattaryn talap etýi qajet jáne ıiskep kórgeni jón. Kóptegen adamdar uıalady, biraq siz oıynshyqty ıiskegende, eger ol ýly bolsa, onyń ótkir ıisi bolady. Fenol qoldanylsa, eger siz ony ıiskeseńiz, belgili bir ýaqyttan keıin oıynshyq tátti ıis shyǵara bastaıdy», - deıdi Ádil Qurǵynbaev.
