SQO-da sańyraýqulaq terýge shyǵyp, adasqan áıel aýylynan 10 km uzap ketken
PETROPAVL. KAZINFORM — Soltústik Qazaqstan oblysynda ormanǵa barǵan zeınetker baǵdaryn joǵaltyp, adasyp ketken.
Oblystyq polıtsııa departamenti baspasóz qyzmetiniń málimetinshe, Jambyl aýdany Troıtskoe eldi mekeniniń turǵyny sańyraýqulaq terý úshin úıinen shyǵyp ketken. Áıel keshikkendikten jubaıy alańdap, polıtsııadan ony tabýǵa kómektesýdi surady.
Joǵalǵan áıeldi izdeýge polıtsııa qyzmetkerleri jumyldyryldy. Olarǵa kómekke aýyl turǵyndary qosyldy. Іzdestirý jumystaryn uıymdastyrýdy aýdandyq polıtsııa bóliminiń krımınaldyq polıtsııa bólimshesiniń bastyǵy Jolaman Aýbakırov qolyna aldy.
Jergilikti turǵyndar men tártip saqshylary top-topqa bólinip, jaqyn mańdaǵy ormandardy túgeldeı aralap shyqty. Іzdeý jumystary shamamen úsh saǵatqa sozyldy. Keshke qaraı maıor Aýbakırovtyń toby zeınetkerdiń daýsyn estip, sharshaǵan áıeldi taýyp, ormannan alyp shyqty.
Aýyl turǵyny bala kezinen jer jaǵdaıyn jaqsy bilgenimen, bul joly baǵdarynan jańylyp, keshke deıin orman ishinde júrgen. Polıtseıler ony aýylynan shamamen 10 shaqyrym jerden tapty. Zeınetker tártip saqshylaryna jáne izdeý jumysyna qatysqan barsha adamǵa alǵysyn bildirdi.
Polıtsııa qyzmetkerleri tabıǵat aıasyna shyqqanda barynsha saq bolýdy, toptan bólinbeı birge júrýdi jáne ózimen árdaıym telefon alyp júrýdi eske salady.
Buǵan deıin SQO-da prokýrorlardyń aralasýynan keıin 30 shaqty ınvestordyń máselesi oń sheshilgenin jazǵan edik.