SQO-da salynyp jatqan keı joldar standartqa saı bolmaı shyqty
PETROPAVL. KAZINFORM — Soltústik Qazaqstan oblysynda jol qurylysynyń sapasyna baqylaý kúsheıtildi. Inspektsııalyq tekseris kezinde birqatar zań buzýshylyqtar men olqylyqtar anyqtaldy.
SQO-da jol qurylysy maýsymynyń qyzǵan shaǵy. Osyǵan oraı «Jol aktıvteriniń sapasy ulttyqortalyǵy» RMK óńirlik fılıaly jol qurylysy men paıdalanylatyn materıaldardyń sapasyna baqylaýdy kúsheıtti.
Jyl basynan beri mamandar salynyp jatqan avtomobıl joldaryna, qaıta jańartý jáne kúrdeli jóndeý nysandaryna 146 ınspektsııalyq tekseris júrgizdi. Nátıjesinde 123 aqaý men zań buzý anyqtaldy. Onyń ishinde 18-i joıylsa, qalǵan 105-i túzetý satysynda.
Tehnıkalyq qadaǵalaý aıasynda jol-qurylys materıalynyń 645 synamasy alynyp, zerthanalyq saraptama júrgizildi. Onyń nátıjesi boıynsha úlginiń 37% normatıvtik-tehnıkalyq qujattama talaptaryna saı kelmegen.
— Eń jıi kezdesetin sáıkessizdikterge toqtalsam — materıaldardyń sýmen qanyǵýy, tyǵyzdalý koeffıtsıenti, túıirshik quramy jáne qysý beriktiginiń shegi tıisti normaǵa saı kelmeıdi. Saraptamany qurylys jumystarynyń bastapqy kezeńderinde júrgizý — kemshilikterdi ýaqytynda anyqtap, olardy joıýǵa múmkindik beredi. Bul óz kezeginde óńirdegi jol ınfraqurylymynyń sapasyn arttyrýǵa yqpal etedi, — deıdi oblystyq fılıal dırektory Joldybaı Tentekov.
Mamandardyń aıtýynsha, osy jyldyń 3 maýsymynan bastap jol qurylysy salasynda jańartylǵan erejeler kúshine endi. Endi tapsyrys berýshiler oryndalǵan jumystar men materıaldardyń sapasyn mindetti túrde ýákiletti uıym arqyly saraptaýy qajet. Jol nysandary tek Jol aktıvteriniń sapasy ulttyq ortalyǵynyń qorytyndysy bolǵan jaǵdaıda ǵana paıdalanýǵa beriledi. Bul ózgerister jol qurylysy sapasyn arttyryp, baqylaýdy kúsheıtýge baǵyttalǵan.
Buǵan deıin halyqaralyq mańyzy bar «Petropavl-Qorǵan» tas jolynyń salynyp jatqanyna bıyl 8 jyl bolǵanyn jazǵan edik.