SQO-da saǵat 21.00-den keıin araq-sharap satqandar qatań jazalanady
PETROPAVL. QazAqparat – Soltústik Qazaqstan oblysy ákiminiń orynbasary Rýslan Álishev jergilikti telearna arqyly óńir turǵyndarynyń kókeıinde júrgen suraqtaryna jaýap berdi, dep habarlaıdy QazAqparat tilshisi.
Óńirdegi karantındik sharalar týraly brıfıngte Rýslan Álishev segiz ózekti máselege toqtaldy.
Turǵyndardyń áli kúnge qala ishinde júrip-turýǵa qatysty suraqtary bar.
Oblys ákimi orynbasarynyń aıtýynsha, dúkenge, dárihanaǵa, jalpy dalaǵa shyqqan jaǵdaıda turǵyn ózimen birge jeke kýáligin alyp júrýi tıis. Polıtseı qalǵan qajetti málimetti planshet arqyly bazaǵa kirip bile alady. Qalaǵa kirip-shyǵý, aýyryp jatqan nemese jalǵyz turatyn týysyna járdemdesý, sý astynda qalý qaýpi bar saıajaıǵa barý máseleleri de nazardan tys qalmady.
«Polıtsııa eń aldymen turǵyndarǵa kómektesýdi maqsat etedi. Sol sebepti ár másele jeke-dara qaralyp, sheshiledi. Degenmen, meniń keńesim – úıden shyqpańyz. Aýdanda bank fılıaly joq bolǵandyqtan aqsha sheship ala almaǵan jaǵdaıda bul máseleni jergilikti ákimdikpen sheshý qajet.
Oblysta kóktemgi sý tasqynyna qarsy shtab jumys istep jatyr. Olar jaǵdaıdy kúndelikti baqylaýda ustap otyr. Qajet bolǵan jaǵdaıda arnaıy qyzmetter jumyldyrylyp, turǵyndardy evakýatsııalaıdy. Shuǵyl jaǵdaıda 112 nómirine habarlasýǵa bolady», - deıdi Rýslan Álishev.
Turǵyndar saýda oryndarynyń tapsyrysty 2-3 kúnnen keıin keshiktirip ákeletinine shaǵymdanǵan bolatyn. Bul másele de sheshimin taýyp jatyr.
«Semeınyı» jáne «Severnyı» saýda jelileri qosymsha shtat aldy. Olarǵa 70 volonter kómektesedi. Azyq-túlik birinshi kezekte karantınde otyrǵandarǵa jetkiziledi. Qazir «Magným» men «Pıramıda» saýda oryndary da tapsyrys qabyldaýdy bastaıdy. Alaıda, sońǵy kezde spırttik ishimdikke tapsyrys berýshiler qatary artqan. Osyǵan baılanysty saǵat 21.00 deıin shekteý qoıyldy. Osy ýaqyttan keıin araq-sharap jetkizgen dúkender jazalanady», - deıdi oblys ákiminiń orynbasary.
Rýslan Álishev sońǵy kúnderi karantınniń alynatyndyǵy jaıynda áleýmettik jelide taraǵan aqparatqa qatysty da pikirin bildirdi.
«Qazaqstandyqtar bir-birine karantın rejıminen shyǵý ýaqytyn jáne jolyn kórsetken qujatty joldap jatyr. Bul aqparat jalǵan. Shtab mundaı qujatty daıyndaǵan joq. Ázirshe karantınniń qashan alynatyny belgisiz. Óıtkeni elimizdiń basqa óńirlerinde áli kúnge joǵary dınamıka saqtalyp otyr», - dedi Rýslan Álishev.
