SQO-da sábılerge kóp qoıylatyn esimder belgili boldy
PETROPAVL. QazAqparat - Soltústik Qazaqstan oblysynda jańa týǵan sábılerge kóp qoıylatyn esimder belgili boldy, dep habarlaıdy QazAqparat tilshisi oblystyq Ádilet departamentine silteme jasap.
Oblystyq Ádilet departamenti baspasóz qyzmetiniń habarlaýynsha, bıylǵy jyly on aı ishinde 5878 náreste dúnıege kelgen. Onyń 3 034-i er bala bolsa, qalǵan 2 844-i - qyzdar.
Mamandar Qyzyljar óńirinde búgingi tańda sánge aınalǵan esimderdiń úzdikterin de jarııalady. Er balalar arasynda Ámir, Álıhan, Artem, Álı, Dmıtrıı, al, qyzdar arasynda Aılın, Ámına, Sofııa, Darıa jáne Aıarý esimderi tanymal eken.
Sonymen qatar, óńirde bıylǵy toǵyz aıdyń ishinde bir jasqa tolmaǵan 63 náreste shetinegen. Statıstıkalyq málimetke súıensek, bul ótken jylmen salystyrǵanda 40 paıyzǵa kóp.
Qaıtys bolǵan soltústikqazaqstandyqtardyń sany - 4950, 2017 jyldyń toǵyz aıymen salystyrǵanda bul kórsetkish 2,5 paıyzǵa az. Turǵyndardyń 19,3 paıyzy júrek-qan tamyrlary aýrýynan, 15 paıyzy tynys aýrýlarynan jáne 10,5 paıyzy isikten kóz jumdy. Adamdardyń 8,8 paıyzy qaıǵyly jaǵdaılardan qaıtys bolǵan.
