SQO-da saban men tsellıýlozadan qaǵaz jasaý isi qolǵa alynbaq
PETROPAVL. QazAqparat – Soltústik Qazaqstan oblysynda jergilikti kásiporyndardyń biri sanıtarlyq-gıgıenalyq qaǵazdy jáne qaǵaz paketterdi shyǵarý isin qolǵa almaq. Jańa joba elde joq tehnologııa boıynsha júzege asady, dep habarlaıdy QazAqparat tilshisi.
Jańa jobanyń ereksheligi – qaǵazdy shyǵarýda túrli shıkizattyń: sabannyń, tsellıýloza jáne makýlatýranyń qoldanylýynda.
«Bizdiń kompanııa bul jobany júzege asyrýdy kópten oılap júr. Zertteýler qaǵazǵa degen qajettiliktiń jyl saıyn artyp kele jatqanyn kórsetedi. Óıtkeni búkil álem ekologııalyq, tez shirıtin zattarǵa basymdyq berýde. Qazir ár qazaqstandyq jylyna shamamen 3 kg qaǵaz qoldanady, Reseıde kórsetkish 5 kg bolsa, Eýropa turǵyndary jylyna 11 kg qaǵazdy paıdalanady.
Biz bastapqyda onǵa jýyq ónim túrin shyǵarýdy josparlap otyrmyz. Olar: qaǵaz súlgiler, dárethana qaǵazy, keńselik tehnıkaǵa arnalǵan qaǵaz, qaǵaz maılyqtar, qaǵaz oramaldar jáne túrli pishimdegi paketter», - deıdi «Radýga» JShS bas dırektory Dmıtrıı Sharapaev.
Kásiporyn jetekshisiniń aıtýynsha, elimizde sanıtarlyq-gıgıenalyq qaǵazdy shyǵaratyn jalǵyz kompanııa Almatyda ornalasqan. Olar eski tehnologııamen tek qaǵaz maılyq óndirisin jolǵa qoıǵan. Shıkizat retinde makýlatýrany qoldanady. «Radýga» JShS de buryn makýlatýrany osy kásiporynǵa ótkizip kelgen. Jańa zaýyt ashylysymen shıkizatty óz óndirisinde qoldanbaq.
«Jańa joba qytaılyq tehnologııamen jumys isteıdi. Qajetti qondyrǵylardy osy aspan asty elinen jetkizemiz. Olar óz qondyrǵylarymen birge mindetti túrde tehnologııany da satady. Al ony ózimizge qaraı yńǵaılap, jetildiremiz», - deıdi Dmıtrıı Sharapaev.
Soltústik Qazaqstan – astyqty óńir. Sol sebepti shıkizat retinde sabannan qıyndyq týmaıdy.
«Jańa jobanyń artyqshylyǵy da osynda – shıkizat qol astynda. Alysqa barýdyń qajeti joq, arzan. Sharýashylyqtar da qar astynda qaldyrmaı, satyp paıda kóredi. Tsellıýloza – premıým klasqa jatatyn shıkizat. Odan óte sapaly qaǵaz jasalady. Biz tsellıýlozadan keńse qaǵazyn jasamaqpyz. Qazirgi ýaqytta shıkizattyń osy túrin jetkizetin kompanııalardy izdestirip jatyrmyz. Birinshi kezekte qazaqstandyq jáne kórshi Reseıdiń óndirýshilerimen jumys isteımiz. Al makýlatýra boıynsha qazir naryqty zerttep jatyrmyz, jetpegenin satyp alamyz», - deıdi kásiporyn basshysy.
«Radýga» JShS 10 jyldan artyq sanıtarlyq-gıgıenalyq maqsattaǵy qaǵaz dıstrıbýtsııasymen aınalysady. Qazaqstannyń 10 qalasynda fılıaly bar. Naryq tanys. Óz ónimderin el ishinde ǵana satpaı, jaqyn shetelge shyǵarýdy da josparlaǵan.
«Naryqty zertteı kele baıqaǵanymyz, mundaı ónimdi 500 km radıýsta ótkizgen tıimdi. 50% eksportqa shyǵarmaq oıdamyz. Óndiristi 2021 jyldyń kókteminde qosýdy josparlap otyrmyz. Qazir jańa zaýyttyń ǵımaratyn qalypqa keltirip jatyrmyz. Qazirgi tańda jobanyń jalpy quny 4 mlrd teńgege baǵalanǵan», - deıdi josparymen bólisken kásipker.
Jańa zaýyt aıyna 500 tonna sanıtarlyq-gıgıenalyq maqsattaǵy qaǵaz ben qaǵaz paketter shyǵaratyn bolady. Óndiriske 50 adam tartylmaq.
«Qazirgi tańda biz de pandemııanyń saldaryn tartyp jatyrmyz. Shetelge shyǵyp qondyrǵylarmen, jańa tehnologııamen jaqyn tanysýǵa múmkindik joq. Bankter de bolashaqta alǵan nesıeni qaıtarýǵa dármeni jeter me eken dep klıentterge senimsizdikpen qaraıtyn bolǵan. Biraq munyń bári ýaqytsha qıyndyq ekenine senemiz. Óńir úshin asa qajet, mańyzdy jobany júzege asyramyz», - deıdi Dmıtrıı Sharapaev.
