SQO-da ruqsat etilmegen qoqys polıgondaryn joıý týraly jalǵan derekter áshkerelendi
ASTANA. KAZINFORM – Soltústik Qazaqstan oblysynyń mamandandyrylǵan tabıǵat qorǵaý prokýratýrasy óńirdegi kommýnaldyq qaldyqtardy basqarý salasynda birqatar zań buzýshylyqtardy anyqtady.
Bas prokýratýranyń tapsyrmasyna sáıkes júrgizilgen taldaý barysynda 79 ruqsat etilmegen qoqys polıgonynyń joıylǵany týraly jalǵan derekter berilgeni belgili boldy. Aqqaıyń, Qyzyljar, Mamlıýt, Taıynsha jáne M. Jumabaev aýdandarynda qaldyqtardyń arnaıy belgilenbegen jerlerge jınaqtalǵany, turmystyq qaldyq polıgondary aýmaǵynan qaldyqtardyń shyǵarylǵany anyqtaldy.
Sonymen qatar, Mamlıýt jáne Qyzyljar aýdandary men Petropavl qalasyndaǵy qoldanystaǵy polıgondar ekologııalyq talaptar men sanıtarlyq normalarǵa sáıkes kelmeıdi. Ekologııa departamenti anyqtalǵan júıeli quqyq buzýshylyqtarǵa shara qoldanbaǵan, bul óńirdegi naqty ekologııalyq jaǵdaıdyń burmalanýyna ákelgen.
- Prokýrorlyq qadaǵalaý nátıjesinde oblys ákimdigi 2025–2026 jyldarǵa arnalǵan ekologııalyq jaǵdaıdy jaqsartýǵa baǵyttalǵan is-sharalar josparyn bekitti. Josparda tarıhı qoqys oryndaryn zańdastyrý, merzimder, qarjylandyrý kólemi jáne baqylaý tetikteri naqty kórsetilgen.
Ruqsat etilmegen qoqys úıindilerin joıý týraly jalǵan esep bergeni úshin jáne ekologııalyq baqylaýdy tıisinshe júrgizbegeni úshin 13 laýazymdy tulǵa, sonyń ishinde Ekologııa departamentiniń basshysy, oblys ákimdigi tabıǵı resýrstar basqarmasynyń basshysy jáne birqatar aýdan ákimderiniń orynbasarlary tártiptik jaýapkershilikke tartyldy, - delingen baqylaýshy organnyń aqparatynda.
SQO tabıǵat qorǵaý prokýrorynyń qaýlysymen ÁQBtK-niń 324 jáne 344-baptary boıynsha 12 aýyldyq okrýg ákimine jalpy somasy 1,3 mln teńge aıyppul salyndy. Barlyq aıyppuldar tolyq óndirildi.
Aıta keteıik, SQO-daǵy Báıterek jáne Beskól turǵyndarynyń mazasyn qashyrǵan qoqys polıgony jabyldy.