SQO-da respýblıkalyq jolda adasyp júrgen 6 jasar balany polıtseıler qutqardy
PETROPAVL. QazAqparat – Soltústik Qazaqstan oblysynda 6 jasar bala úıinen shyǵyp, adasyp ketken. Ony polıtseıler respýblıkalyq avtojolda taýyp aldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, kezekshilik atqaryp júrgen patrýldik polıtsııa batalonynyń qyzmetkerleri «Petropavl – Nur-Sultan» avtojolynyń boıynda ketip bara jatqan balany kórip qalady. Polıtseıler toqtap, ony sózge tartyp, Báıterek aýylynyń turǵyny ekenin anyqtaǵan. Úı aýlasynan shyǵyp, adasqan bala jol boıymen júre-júre 10 shaqyrymdaı ótipti. Tártip saqshylary balany Beskól aýylyndaǵy ájesiniń úıine jetkizdi. Al ata-anasy ony ózderi izdep, áli polıtsııaǵa habarlap úlgermegen eken.
«Otbasymnyń atynan Sizge qyzmetkerlerińizge jaqsy tárbıe bergenińizge zor alǵysymdy bildiremin. Olar barlyq QR quqyq qorǵaý organdarynyń mártebesin kóterýde. Osyndaı tártip saqshylary turǵyndardyń qurmetine bólenedi», - dep balanyń anasy SQO PD bastyǵy Marat Tólebaevtyń atyna hat jazdy.
Polıtsııa qyzmetkerlerine alǵys bildirgen taǵy bir jazba áleýmettik jelide paıda boldy. ıAvlenka eldimekeni turǵynynyń VAZ-21112 kóligi jolda kele jatyp synyp qalǵan.
«Kóligim synyp, jolda qaldym. Ótken-ketkenniń eshqaısy toqtamaı qoıdy. Jol polıtsııasy qyzmetkerleri toqtap, mashınamdy aýdan ortalyǵyna deıin súırep jetkizdi. Jaraısyńdar jigitter!» dep jazdy eldimeken turǵyny.
SQO PD patrýldi polıtsııa batalonynyń komandıri Erlan Mádıevtiń aıtýynsha, qıyn jaǵdaıda qalǵan turǵyndarǵa kómek kórsetý polıtseılerdiń kásibı mindeti. Desek te, halyqtyń alǵysy olarǵa óz jumystaryn óte jaqsy isteýge yntalandyrady.
