SQO-da respýblıkalyq jáne oblystyq birqatar trassa jabyq tur
PETROPAVL. QazAqparat – Soltústik Qazaqstan oblysynda aýa raıynyń qolaısyzdyǵyna baılanysty 7 respýblıkalyq jáne oblystyq mańyzdaǵy barlyq avtojol jabyq, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, óńirde 9 jáne 10 naýryzǵa daýyldy eskertý jarııalandy. SQO aýmaǵynda qatty jel turyp, qar aralas jańbyr jaýady. Tuman túsip, kóktaıǵaq bolady.
Qazir óńirde 7 respýblıkalyq, oblystyq mańyzy bar barlyq jol jabyq.
SQO TJD basqarmasynyń bastyǵy Dmıtrıı Rastıhınniń aıtýynsha, kúnniń jylynýyna baılanysty qar aýyr tartqan, tehnıka tazalap úlgere almaı jatyr. Oblysta jabyq jatqan aýyldar bar. Jergilikti atqarýshy bılik, jaýapty mekemeler oblystaǵy joldardy ashý úshin bar kúsh-jigerdi jumsap jatyr.
«5-9 naýryz aralyǵynda óńirde 174 adam, sonyń ishinde 4 bala qutqaryldy. Qar qursaýynda qalǵan 56 tehnıka shyǵaryldy. Onyń 18-i júk kóligi.
Turǵyndardy bul kúnderi múmkindiginshe eldi mekenderden alysqa uzap shyqpaýǵa shaqyramyz. Óıtkeni keı ýchaskelerden kólikpen ótý qıyn. Tehnıkalar joldy tazalap úlgermeı jatyr. Jolǵa shyqpas sınoptıkterdiń boljamyna nazar aýdaryńyzdar, daýyldy eskertýlerge qulaq salyńyzdar», - deıdi Dmıtrıı Rastıhın.
