SQO-da respýblıkalyq mańyzy bar avtojoldardyń aspapty dıagnostıkasy júrgizildi
PETROPAVL. QazAqparat – Soltústik Qazaqstan oblysynda bıyl respýblıkalyq mańyzy bar 1,5 myń shaqyrym avtojol aspapty dıagnostıkadan ótti, dep habarlaıdy QazAqparat tilshisi.
Elimizde respýblıkalyq mańyzy bar avtomobıl joldarynyń naqty jaǵdaıyn baǵalaý maqsatynda aspaptyq monıtorıng júrgizilip jatyr. Bıyl respýblıkalyq jeliniń 78 %-y nemese shamamen 19 myń shaqyrym jol qamtylmaq.
SQO-da respýblıkalyq mańyzy bar 2 myń shaqyrymǵa jýyq jol bar. Bıyl onyń 1475,5 shaqyrymy dıagnostıkadan ótti. Avtojoldyń 1221 shaqyrymynda qazirgi jaǵdaıy, al 254 shaqyrymynda kepildendirilgen jol ýchaskeleri baǵalandy.
«Aldymen zertteletin nysandar jaıynda aqparat jınaldy. Máselen avtojol qashan salyndy, qaı jyldary jóndeldi, jol-kólik oqıǵalary, tehnıkalyq sanaty sııaqty málimet jınaldy. Keıin monıtorıng júrgizýde qoldanylatyn aspaptardyń sáıkestigi, sertıfıkattary tekserildi. Dıagnostıkalaýǵa jumysty tez jáne tıimdi júrgizý maqsatynda zamanaýı tsıfrlyq qurylǵylar qoldanyldy. Maýsym aıynda alqaptyq jumystar bastaldy. Jol qozǵalysynyń qarqyndylyǵy men kólik aǵyny alynyp, panoramalyq beınetúsirilim jáne jol kemshilikteriniń beınejazbasy, joldardyń tehnıkalyq kúıi jáne aqaýlardyń jıyntyq tizimi jasaldy. Geometrııalyq parametrleri men trassanyń jospary da alynady», - deıdi Jol aktıvteriniń ulttyq sapa ortalyǵy SQO fılıalynyń dırektory Joldybaı Tentekov.
Mamannyń aıtýynsha, Qazaqstandaǵy jol ınfraqurylymy qaýipsizdigin dıagnostıkalaý men baqylaý osydan eki jyl buryn qolǵa alyndy. 2019 jyly Pavlodar jáne Qaraǵandy oblystarynda 2 myń shaqyrymnan astam jol taldandy. Byltyr mamandar 16 myń shaqyrym joldy dıagnostıkadan ótkizdi. Aspaptyq dıagnostıka respýblıkalyq avtomobıl joldarynyń naqty jaǵdaıyn jáne qaýipsizdik reıtıngin shyǵarýǵa kómektespek.
