SQO-da respýblıkalyq mańyzy bar Jezqazǵan — Petropavl tas joly jóndelip jatyr
PETROPAVL. KAZINFORM — Soltústik Qazaqstan oblysynda bıyl 215 shaqyrymǵa jýyq respýblıkalyq joldardy jańartý josparlanǵan. Onyń ishinde «Jezqazǵan-Petropavl» tas joly bar.
SQO ákimdiginiń málimetinshe, qazir «Jezqazǵan-Petropavl» trassasynda jumys úsh aýdanda: Shal aqyn, Esil jáne Qyzyljar aýdandarynda júrip jatyr.
— Joba boıynsha bul jolǵa jańadan asfalt tóseledi. Toǵyz sý ótkizgish qubyrdy jóndeý, tórt avtopavılon ornatý, jol belgileri men tosqaýyl qorshaýlardy montajdaý kózdelgen», — dep habarlady «QazAvtoJol» UK» AQ SQO boıynsha fılıalynda.
«Jezqazǵan-Petropavl» avtojolynyń jalpy uzyndyǵy 954 shaqyrym. Onyń ishinde 359 km SQO aýmaǵy arqyly ótedi. Mamandardyń aıtýynsha, bul jol 1980 jyldardan beri kúrdeli jóndeýdi kórmegen, tek jeke ýchaskelerde ǵana shuńǵyrlardy jabý jumysy júrgizildi. Jańǵyrtý jobasy byltyr bastalyp, 83 shaqyrym qalpyna keltirildi.
Jalpy, óńirdegi avtomobıl joldarynyń jalpy uzyndyǵy 8416 shaqyrym. Onyń ishinde 1970 km respýblıkalyq jelige, 1983 km oblystyq jelige, 4463 km aýdandyq jelige tıesili.
SQO — joldardyń uzyndyǵy boıynsha respýblıkada ekinshi orynda. Sońǵy jyldary onyń sapasyn jaqsartýǵa basa nazar aýdarylyp keledi. Eki jyl ishinde oblysta 1600 shaqyrymnan astam avtojol qalpyna keltirildi. Normatıvtik jaǵdaıdaǵy jergilikti joldardyń úlesi 84% deıin ósti. Respýblıkalyq jeli boıynsha bul kórsetkish — 87%.
Bıyl jalpy 1,1 myń shaqyrym joldy jóndeý josparlanǵan. Onyń ishinde 467 shaqyrym respýblıkalyq jeli jáne 700 shaqyrym jergilikti joldar men kósheler, onyń ishinde 35 eldi mekende 100 shaqyrym kentishilik joldar. Bul — 102 joba, onyń 35-i byltyrdan qalǵan. Olardyń qatarynda Pokrovka — Petropavl, Qaırankól — Blagoveşenka, Dáýit — Kishkenekól, Meńkeser — Razdolnoe, Gorkovskoe — Voshodskoe, Kishkenekól — Qaraterek, Smırnovo — Qııaly, Pokrovka — Ilınka, Smırnovo — Tokýshı, Povozochnoe — Baıan, ıAlty — Shaqpaq sııaqty negizgi ýchaskelerdi qaıta jańartý jáne jóndeý bar.
Buǵan deıin 11 mamyrdan bastap «Balqash-Býrylbaıtal» avtojoly aqyly bolatyndyǵyn jazǵan edik.