SQO-da respýblıkalyq mańyzy bar avtojoldy bes jerden sý shaıyp ketti
PETROPAVL. KAZINFORM – Soltústik Qazaqstan oblysynda «Roşınskoe-Korneevka-Voloshınka» respýblıkalyq mańyzy bar avtomobıl jolyn bes jerden sý shaıyp ketti. Qazirgi ýaqytta sý basqan ýchaskede kezekshilik uıymdastyrylyp, arnaıy belgiler qoıyldy.
«QazAvtoJol» UK» AQ SQO fılıaly baspasóz qyzmetiniń málimetinshe, búgingi saǵat 11.00-degi málimet boıynsha «Roşınskoe-Korneevka-Voloshınka» R-59 respýblıkalyq mańyzy bar avtojolynyń 20 km-den 39 km-ge deıingi aralyǵyndaǵy ýchaskelerdi sý shaıdy. Kólikterdiń ótýine shekteý qoıylǵan joq, sý alǵan ýchaskelerdiń uzyndyǵy 500-150 metr aralyǵynda, tereńdigi negizinen 10-15 sm, tek bir jerde ǵana 35 sm-ge deıin jetken.
«Bul ýchaskede 3 sý ótkizgish qubyr bar. Qazirgi ýaqytta 8 tehnıka jáne 10 adam jumys istep jatyr. Jol belgileri men sıgnal baǵandary qoıylǵan. Inertti materıaldan bóget jasalyp, sondaı-aq sýdy burý boıynsha jumystar júrgizilip jatyr. Al, Roşınskoe eldi mekeninen Voloshınkaǵa deıin 0-47 km ýchaskede 4 sáýir saǵat 16.15-ten bastap shekteý engizildi. Jol polıtsııasynyń beketteri qoıyldy. Táýlik boıy kezekshilik uıymdastyrylǵan», - deıdi «QazAvtoJol» UK» AQ SQOF dırektorynyń orynbasary Qanat Óserbaev.
Sondaı-aq Ǵabıt Músirepov atyndaǵy aýdannyń ortalyǵy Novoıshımskoe aýylynyń turǵyn úılerin sý basý qaýpine baılanysty 4 sáýir saǵat 16:20-da tasqyn sýdy ótkizý úshin «Jezqazǵan-Petropavl» A-16 respýblıkalyq mańyzy bar avtomobıl jolynyń 706 km ýchaske ashyldy. Bul ýchaskede 2*2 ólshemdi qubyr bar, ol 100% jumys istep tur, biraq, aǵyn sýdy ótkizip úlgermeı jatyr.
«Osyǵan oraı «Jezqazǵan-Petropavl» avtojolynyń 701-706 km-de kóliktiń barlyq túrine shekteý engizildi. Jol polıtsııasynyń beketteri qoıyldy. Táýlik boıy kezekshilik uıymdastyryldy. Qazirgi ýaqytta túngi sýyqqa baılanysty sý deńgeıi tómendedi, sý deńgeıi únemi baqylaýda, keıin ashylǵan jolǵa 1 metrlik sý ótkizgish qubyr qoıylyp, jabylatyn bolady», - deıdi oqıǵa ornynda júrgen «QazAvtoJol» UK» AQ SQOF dırektory Aqylbek Qabyldın.
