SQO-da respýblıkalyq mańyzy bar avtojoldardyń qysqy jaǵdaıy tekserildi
PETROPAVL. KAZINFORM — Soltústik Qazaqstan oblysynda respýblıkalyq mańyzy bar joldarda reıd ótip, jaýapty uıymdarǵa anyqtalǵan olqylyqtardy joıýǵa nusqama berildi.
«Jol aktıvteriniń sapasy ulttyq ortalyǵy» fılıalynyń málimetinshe, jol qozǵalysy qaýipsizdigin qamtamasyz etý maqsatynda «QazAvtoJol» ulttyq kompanııasynyń mamandarymen birlesken reıd ótken. Jalpy, jyl bastalǵaly osyndaı úsh tekseris uıymdastyrylyp, 128 km jol qamtyldy.
Reıd barysynda qysqy kezeńge daıyndyq deńgeıi, arnaıy tehnıkalardyń jaraqtandyrylýy, sondaı-aq taıǵaqqa qarsy materıaldardyń qory da tekserildi.
— Kólik mınıstrligi Avtomobıl joldary komıtetiniń tapsyrmasyna sáıkes fılıal janynan komıssııa quryldy. Komıssııa quramyna «QazAvtoJol» jáne «KAJservıs» uıymdarynyń ókilderi endi. Komıssııalyq tekseristiń qorytyndysy boıynsha tıisti akt jasalyp, komıtetke joldanady, — deıdi «Jol aktıvteriniń sapasy ulttyq ortalyǵy» fılıalynyń dırektory Qanat Óserbaev.
SQO-da respýblıkalyq mańyzy bar avtomobıl joldarynyń jalpy uzyndyǵy shamamen 2 myń shaqyrym. Onyń ishinde 30 shaqyrym jol qaıta jańǵyrtýdan, 57 shaqyrymy kúrdeli jóndeýden ótkizilip jatyr.
Joldardy kútip-ustaý jumystary «QAJservıs» JShS júktelgen. Qysta 150-den astam arnaıy tehnıka men 315 maman joldardyń tazalyǵyna jaýap beredi. Bıyl qysqy jol kútimine 1900 tonna tuz, 4300 tonna qum, 710 tonna elekten ótken materıal jáne 72 tonna arnaıy reagent daıyndalǵan.
Monıtorıng barysynda 2 eskertý tirkelip, olar baqylaýǵa alyndy. Atap aıtqanda, joldy qar basyp, ol tyǵyzdalyp basylyp qalǵan jáne jıeginde qar úıindileri anyqtaldy. Mamandardyń aıtýynsha, bul jol qozǵalysy qaýipsizdigine tikeleı áser etedi. Kemshilikter A-13 «Kókshetaý — Kishkenekól — Bıdaıyq — RF shekarasy (Omby)» avtojolynyń 213–280 shaqyrym aralyǵynda tirkeldi. Ýchaskege qyzmet kórsetetin merdiger uıym — «Kókshetaýavtodor» JShS-ge kemshilikterdi joıýǵa nusqama berildi.
Buǵan deıin SQO-da jol sapasyn tekserýge jasandy ıntellekt qoldanylyp jatqanyn jazǵan edik.