SQO-da Respýblıka kúnine oraı halyqaralyq qolónershiler festıvali ótedi

PETROPAVL. QazAqparat – Soltústik Qazaqstan oblysynda Respýblıka kúnine oraı aýqymdy baǵdarlama josparlanǵan. Onyń aıasynda túrli is-sharalar – semınarlar, kórmeler, kontsertter, festıvalder ótpek, dep habarlaıdy QazAqparat tilshisi.

SQO mádenıet, tilderdi damytý jáne arhıv isi basqarmasynyń basshysy Dosbol Ábdirısovtyń aıtýynsha, merekeniń áleýmettik mıssııalarynyń biri – árbir azamattyń muqtaj jandarǵa kómek kórsetýine múmkindik berý. Osyǵan oraı, volonterlik, qaıyrymdylyq jáne eriktiler uıymdary arqyly azamattardyń áleýmettik osal toptaryn qoldaý úshin «Janashyr Júrek» respýblıkalyq aktsııasy ótip jatyr.

Jalpy, SQO-da Ulttyq mereke – Respýblıka kúnin toılaýǵa arnalǵan is-sharalar bastalyp ketti. Máselen, búgin «Abylaıhan rezıdentsııasy» mýzeı kesheninde «Táýelsizdik – babalardyń urany» kórmesi ashylady. Kórermen nazaryna qazaqtyń ulttyq qarýlary – sadaq, naıza, qylysh, soıyl, balta sekildi birneshe túri qoıylǵan.

«Merekege oraı kitaphanalarda túrli kórme, dóńgelek ústelder uıymdastyrylady. Teatrlarda taqyryptyq qoıylymdar josparlanǵan. Máselen, Sábıt Muqanov atyndaǵy qazaq sazdy-drama teatrynda «Elim-aı» spektakli kórermenge jol tartady. Saýda-oıyn-saýyq ortalyqtary kontsertter, merekelik baǵdarlamalar ótkizedi.

Qazaqstan halqy Assambleıasynyń bastamasymen óńirdiń túrli etnos ókilderi arasynda patrıottyq is-sharalar, «Jańa Qazaqstan. Taza tabıǵat» egıdasy aıasynda jappaı ekologııalyq aktsııalar ótkiziledi», - deıdi Dosbol Ábdirısov.

Dástúrli kúzgi aýyl sharýashylyǵy jármeńkesi de bıyl merekege oraılastyrylyp, 22 qazanda ótpek.

«Qyzyljar – sheberler mekeni» halyqaralyq qolónershiler festıvali josparlanǵan. Festıval barysynda sheberlik synyptary ótip, jármeńke bolady. Oǵan Tájikstan, Qyrǵyzstan, Reseıden jáne Qazaqstannyń basqa da óńirleriniń sheberleri qatysady. Qazannyń 24-25-i qolónershiler festıvali Ortalyq alańda jalǵasady.

Petropavlda halyqtyq mereke 24 qazan ortalyq alańda Aqan seri atyndaǵy oblystyq fılarmonııa ártisteriniń kontsertimen bastalady, al 25 qazan kúni «Ninety One» tobynyń qatysýymen «Qyran elim – Qazaqstanym!» merekelik kontserti ótedi», - deıdi basqarma basshysy.

Merekege oraı, oblys boıynsha áleýmettik mańyzy bar jańa nysandar ashylyp, paıdalanýǵa berilmek.