SQO-da Reseımen shekaradaǵy blokpostar ázirshe alynbaıdy
SQO polıtsııa departamenti baspasóz qyzmetiniń málimetinshe, oblys aýmaǵynda ornalasqan 14 blokpostta 250-den astam tártip saqshysy, odan basqa medıtsınalyq jáne veterınarlyq qyzmettiń mamandary jumys istedi. Eki aıǵa jýyq ýaqyt boıy aldyńǵy shepte tynbaı qyzmet atqarǵan polıtseıler men medıtsına qyzmetkerlerin Polıtsııa departamentiniń basshylyǵy quttyqtady.
«Búgin otbasylaryńyzǵa oralyp, ata-analaryńyzben, bala-shaǵamen qaýyshasyzdar. Sizderdiń týǵan-týystaryńyzǵa udaıy qoldaý bildirip, túsinistik tanytqany úshin alǵysym sheksiz. Ortaq kúsh-jigermen aldaǵy ýaqytta da el azamattarynyń qaýipsizdigi men densaýlyǵy úshin birge jumys isteımiz dep senemin», - dedi tártip saqshylary men medıkterge alǵys hat tapsyrǵan oblystyń bas polıtseıi Marat Tólebaev.
Reseımen shekaralas Mamlıýt, Ýálıhanov jáne Maǵjan Jumabaev aýdandarynda ornalasqan úsh blokpost shekara ashylǵanǵa deıin jumystaryn jalǵastyrady. Basqa beketterdegi qyzmetkerlerdi Polıtsııa departamenti bastyǵynyń orynbasarlary men aýdandyq bólinisterdiń bastyqtary quttyqtady. Aıyrtaý aýdanyndaǵy Antonovka aýylyna polıtsııa departamenti bastyǵynyń birinshi orynbasary Qanat Aıtbaev bardy. Ol barlyq qyzmetkerlerge adal qyzmetteri úshin rızashylyǵyn bildirip, alǵys hattar tabystady.
Polıtseıler men medıtsına qyzmetkerleriniń aıtýlarynsha, osy kúndi ásirese olardyń týystary asyǵa kútken. Munyń májbúrli shara ekenin barlyǵy jaqsy túsinedi. Mamandar óz jumysyn abyroımen atqaryp shyqty jáne qoıylǵan shekteýler jaǵdaıdy jaqsartýǵa septigin tıgizgenine senimdi.
«Árıne, turǵyndarǵa da alǵys aıtamyz. Túrli jaǵdaılar boldy, negizinen adamdar ońaı emesin túsinip, bizge qoldaý kórsetip jatty», - deıdi Aıyrtaý aýdanynyń aýmaǵynda qyzmet atqaratyn SQO PD patrýldik polıtsııa batalony qyzmetiniń ınspektory Ashat Baqytjanov.
Úıinde ony jary men úsh kishkentaı búldirshini taǵatsyzdana kútti, balalardyń merekesinde ákeleriniń úıge oralýy olar úshin úlken syı boldy.
