SQO-da reseılik alaıaq seksendegi qarııanyń 140 myń teńgesin qoldy etken
PETROPAVL. QazAqparat - Soltústik Qazaqstan oblysynda alaıaq 80 jastaǵy turǵyndy aldap, 140 myń teńgesin qaltasyna basqan. Polıtseıler kúdikti Reseı azamatyn qolǵa túsirdi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Mamlıýt aýdanynyń polıtsııa bólimine aýdan ortalyǵynyń 80 jastaǵy turǵyny aryzdanǵan. Aıtýynsha, úı-úıdi aralap, sháli satyp júrgen saýdager egde jastaǵy turǵyndy áńgimege tartqan. Qart adamnyń senimine kirip, alda aqsha reformasy bolatyndyǵyn aıtqan. Ábigerge túsken áıelge aqsha aıyrbastaýǵa óz «kómegin» usynypty. Zeınetker bar jıǵan-tergen 140 myń teńgesin jalǵan sývenır kýpıýraǵa aıyrbastap qala beredi.
Ýaqyt óte kóńiline kúdik uıalaǵan ol jaqyn mańdaǵy dúkenniń satýshysyna kýpıýrany kórsetken. Satýshy aqshanyń jalǵan ekendigin rastap, birden polıtsııaǵa qońyraý shalypty. Ýaqyt ozdyrmaı júgingenniń arqasynda sol kúni kúdikti qolǵa tústi. Reseı Federatsııasynyń 64 jastaǵy turǵyny Qazaqstandaǵy týystaryna jıi qonaqqa kelip turady eken.
Polıtseılerdiń aıtýynsha, osy fakti QR Qylmystyq kodeksiniń 190-baby 1-b. «Alaıaqtyq» boıynsha Sotqa deıingi tergep-tekserýdiń biryńǵaı tizilimine engizildi. Urlanǵan zattar jábirlenýshige qaıtaryldy.
«Jalǵyz basty qart adamdar jıi alaıaqtarǵa jem bop jatady. Egde jastaǵy týystaryńyz, tanystaryńyzben túsindirme áńgime júrgizip, olarǵa beıtanys adamdarmen sóılesken kezde asa saq bolýdy, aqshaǵa qatysty usynystaryna senbeýdi túsindirgenderińiz jón», - deıdi Mamlıýt aýdanynyń polıtsııa bólimi bastyǵy Serik Áljanov.
Mamandardyń aıtýynsha, SQO-da jyl basynan alaıaqtyqtyń 110 deregi tirkelgen. Onyń ishinde 65-i ashylyp, 39-y boıynsha tergeý áreketteri júrgizilýde.
