SQO-da Reseıden kelgen azamat aýyldaǵy ata-anasyna koronavırýs juqtyrdy
PETROPAVL. QazAqparat - Soltústik Qazaqstan oblysynda úsh adamnan koronavırýs ınfektsııasy tabylǵan, dep habarlaıdy QazAqparat Memlekettik komıssııanyń shuǵyl shtabyna silteme jasap.
1983 jylǵy RF azamaty (Omby qalasynan) - «Omby ‒ Qostanaı» baǵyty boıynsha kele jatqan júk kóliginiń júrgizýshisi. Ol 21 sáýir kúni SQO-ǵa kelip, Músirepov aýdanynyń Chervonnoe aýylynda turatyn ata-anasynyń úıine toqtaǵan. Shekaradan ótý kezinde odan COVID-19-ǵa analız alynǵan, zertteý nátıjesi teris boldy. Osy ýaqyt boıy RF azamaty úı karantıninde boldy. 5 mamyr kúni ol qaltyraý, jótel, dene qyzýynyń 37 gradýsqa deıin kóterilýine baılanysty shaǵymdanǵan. Ol Músirepov aýdandyq aýrýhanasy juqpaly aýrýlar bólimshesine jatqyzylyp, qaıta tekserildi. 6 mamyrda onyń COVID-19 vırýsyn juqtyrǵany anyqtaldy.
Jedel túrde naýqaspen birge turǵan 1956 jyly týǵan ákesi jáne 1959 jyly týǵan anasy tekserildi. Zerthanalyq zertteý nátıjesi olardyń da COVID-19 vırýsyn juqtyrǵanyn kórsetti. Otbasy qazir Ǵ. Músirepov atyndaǵy aýdannyń juqpaly aýrýlar statsıonaryna jatqyzylǵan. Patsıentterdiń jaǵdaıy - qanaǵattanarlyq. Bekitilgen hattamaǵa sáıkes emdeý bastaldy. Baılanys jasaǵan adamdardyń sany belgilenýde. Epıdemıologııalyq tekserý jalǵasýda.
6 mamyrdaǵy jaǵdaı boıynsha SQO aýmaǵynda 33 adam COVID-19 juqtyrǵan. Onyń ishinde bir naýqas - Kókshetaý qalasynan.
