SQO-da Reseıden ákelingen taqtaıdan qaýipti karantındik zııankes tabyldy
PETROPAVL. KAZINFORM — Soltústik Qazaqstan oblysynda karantındik fıtosanıtarııalyq baqylaý barysynda qurylysqa ákelingen aǵash materıaldarynan qara súgen qońyzynyń dernásilderi tabyldy. Nátıjesinde Reseıden ákelingen 30 tekshe metr qaraǵaı pılomaterıaldary tolyq joıyldy.
Osy derek boıynsha ónimdi elge kirgizgen kásipkerge qatysty ákimshilik sharalar qoldanyldy. Sot sheshimimen oǵan 30 aılyq eseptik kórsetkish mólsherinde, ıaǵnı 130 myń teńge shamasynda aıyppul salyndy.
Agroónerkásiptik keshendegi memlekettik ınspektsııa komıtetiniń SQO aýmaqtyq ınspektsııasynyń bas mamany Gúlnar Áýbákirovanyń aıtýynsha, fıtosanıtarlyq karantındik baqylaý qaýipti zııankesterdiń el aýmaǵyna enýi men taralýynyń aldyn alýǵa baǵyttalǵan. Sondyqtan karantınge jatatyn ónimderdi ákelý kezinde fıtosanıtarlyq talaptardy saqtaý mindetti. Bul elimizdiń fıtosanıtarlyq qaýipsizdigin qamtamasyz etýge múmkindik beredi.
Mamandardyń aıtýynsha, bul bıyldyqqa tirkelgen alǵashqy osyndaı jaǵdaı. Ótken jyly óńirde karantındik nysandardyń bes deregi anyqtalǵan. Olardyń basym bóliginde de zııankester shetelden ákelingen taqtaılardan tabylǵan.
Agroónerkásiptik keshendegi memlekettik ınspektsııa komıtetiniń málimetinshe, qara súgen qońyzy aǵashqa zııan keltiretin asa qaýipti tehnıkalyq zııankesterdiń biri. Bul jándikterdiń 1,5 myń túri kezdesedi. Olar aǵashtyń qabyǵyn, súregin zaqymdaıdy. Ásirese dernásilderi aǵash ishinde damyp, orman jáne aýyl sharýashylyǵyna eleýli zııan keltiredi.
Bul jándikter aǵashty búldirip qana qoımaı, ormanǵa asa qaýipti parazıt — qaraǵaı dińgek nematodasyn taratady. Sondaı-aq olar aǵashtyń kógerý aýrýyn týdyratyn sańyraýqulaq sporalaryn da tasymaldaıdy. Sondyqtan orman aýmaqtaryn tazalaý, aǵash qaldyqtaryn der kezinde joıý jáne súrekti uzaq ýaqyt qabyǵymen saqtamaý sekildi aldyn alý sharalaryn saqtaý mańyzdy.
Buǵan deıin elge zańsyz ákelingen karantındik ónimderdiń joly kesilgenin jazǵan edik.
