SQO-da Reseıden ákelingen qurylys materıaldarynan zııankester tabylyp, taqtaılar tolyq joıyldy
PETROPAVL. KAZINFORM — Soltústik Qazaqstan oblysyna Reseıden ákelingen taqtaılarda karantındik zııankes — shyrshanyń kishi qara murtty qońyzy bolǵan.
Agroónerkásiptik keshendegi memlekettik ınspektsııa komıtetiniń SQO aýmaqtyq ınspektsııasynyń málimetinshe, bul derek karantındik fıtosanıtarııalyq baqylaý barysynda anyqtalǵan.
— 2 maýsymda Petropavlda memlekettik ósimdikter karantıni ınspektorlary Reseıdiń Qorǵan oblysynan jetkizilgen kólemi 33 tekshe metr qaraǵaı taqtaıdardy tekserý barysynda karantındik zııankes — shyrshanyń kishi qara murtty qońyzy (ımago) baryn anyqtady.
Ol «Fıtosanıtarııa» respýblıkalyq memlekettik kásiporny júrgizgen karantındik fıtosanıtarııalyq saraptama nátıjesinde rastaldy, — deıdi aýmaqtyq ınspektsııanyń bas mamany Gúlnur Áýbákirova.
Osy derek boıynsha jeke kásipkerge qatysty Qazaqstan Respýblıkasy Ákimshilik quqyq buzýshylyq týraly kodeksiniń 400-baby 2-bóliginiń 1) tarmaqshasyna sáıkes ákimshilik is qozǵaldy.
Sot sheshimimen kásipker kináli dep tanylyp, oǵan 130 myń teńge mólsherinde aıyppul salyndy. Sondaı-aq karantındik zııankesi bar qurylys materıaldary tárkilenip, joıyldy.
Mamandardyń málimetinshe, óńirde fıtosanıtarııalyq qaýipsizdikti qamtamasyz etý maqsatynda karantındik baqylaý turaqty túrde júrgizilip keledi. Jyl basynan beri bul anyqtalyp otyrǵan osymen toǵyzynshy jaǵdaı.
Buǵan deıin Reseıden ákelingen 30 tekshe metr qaraǵaı pılomaterıaldary tolyq joıylǵanyn jazǵan edik.
