SQO-da referendýmda 4 myńnan astam adam alǵash ret daýys beredi

PETROPAVL. KAZINFORM — Soltústik Qazaqstan oblysy referendýmdy ótkizýge daıyn. Daýys berýshilerge naýqan jaıynda eskertý sms habarlandyrýlary jiberildi. 

SQO aýmaqtyq referendým komıssııasynyń málimetinshe, barlyǵy 364 767 azamat tizimge engizilgen, onyń ishinde 4145 — alǵash ret daýys beretin azamattar.

Petropavl qalasynda 157 493 daýys berýshi azamat tirkelgen.

— Oblysta eki myńǵa jýyq múgedektigi bar adam referendýmda daýys beredi. Olar densaýlyǵyna baılanysty referendým ýchaskesine kele almasa, úılerinde óz tańdaýyn jasaýǵa múmkindik jasalady.

Sondaı-aq, 15 naýryz kúni bekitilgen ýchaskede daýys bere almaıtyn azamattardyń esine salǵymyz keledi. Olar 14 naýryz saǵat 18.00-ge deıin óz ýchaskesine baryp, basqa jerde daýys berý quqyǵyn beretin kýálikti alyp ketýi qajet.

Eskeretin bir jaıt, bul múmkindikti basqa qalaǵa, eldi mekenge jol júretinder ǵana qoldana alady, — deıdi SQO aýmaqtyq referendým komıssııasynyń múshesi Saǵyndyq Rahymjan.

Referendým kúni jalpy óńir boıynsha 596 referendým komıssııasy jumys istese, onyń 15-i — aýmaqtyq, al 581-i — ýchaskelik referendým komıssııalary bolmaq.

Komıssııalardyń 3382 múshesi, onyń ishinde: aýmaqtyq komıssııalarda — 105, ýchaskelik komıssııalarda — 3277 adam jumys isteıdi.