SQO-da «Qutty meken» jobasynyń barysyn arnaıy toptar baqylaıdy
PETROPAVL. QazAqparat – Soltústik Qazaqstan oblysynda áleýmettik nysandardyń qurylysy men jóndeý jumystaryn «Nur Otan» partııasynyń depýtattarynan qurylǵan arnaıy monıtorıng toptary baqylamaq, dep habarlaıdy QazAqparat tilshisi.
«Nur Otan» partııasy Soltústik Qazaqstan oblystyq fılıaly baspasóz qyzmetiniń málimetinshe, bul sheshim oblystyq máslıhattaǵy «Nur Otan» partııasy depýtattyq fraktsııasynyń otyrysynda qabyldandy.
Monıtorıng toptary «Qutty meken» ulttyq jobasynyń negizgi baǵyttary boıynsha jumys istemek. Olar – bilim berý, densaýlyq saqtaý, mádenıet jáne sport nysandaryn, turǵyn úı, avtomobıl joldaryn, sondaı-aq turǵyn úı-kommýnaldyq sharýashylyq nysandaryn, sý jáne jylýmen qamtamasyz etý jelilerin jóndeý jáne salý jumystarynyń sapaly júrgizilýin nazarda ustaıdy.
Monıtorıng toptarynyń sany altaý bolmaq. Quramyna oblystyq máslıhattaǵy «Nur Otan» partııasy depýtattyq fraktsııasynyń jáne partııalyq baqylaý komıssııasynyń músheleri, qoǵam ókilderi kiredi. Toptar bıýdjet qarajatynyń neǵurlym tıimdi jumsalýyn, sondaı-aq nysandardyń merziminde salynyp nemese jóndelýin baqylaıdy. Olardyń jumysyn partııanyń óńirlik fılıaly úılestirmek.
«Bıýdjet qarajatynyń árbir teńgesi maqsatty paıdalanylyp, jumystar belgilengen merzimde jáne sapaly júrgizilýi tıis. Fraktsııa depýtattary, monıtorıng toptarynyń tóraǵalary bul máselelerdi partııalyq baqylaýǵa alýlary qajet. Monıtorıng toptary apta saıyn partııanyń oblystyq fılıalyna esep beretin bolady», - deıdi oblystyq máslıhattaǵy «Nur Otan» partııasy depýtattyq fraktsııasynyń basshysy ıÝrıı Belonog.
SQO-da 180 áleýmettik nysan partııalyq baqylaýǵa alyndy. Olarǵa bıýdjetten jalpy alǵanda 25 mlrd astam teńge bólindi.
«Jergilikti jerlerdegi nurotandyqtar bıýdjet qarajatyn tıimdi paıdalaný máselesin erekshe baqylaýǵa alýǵa, kemshilikterdi anyqtaýǵa belsene aralasýy qajet. BAQ-tyń nemese turǵyndardyń másele kótergenin kútpeı, oza áreket etýimiz kerek», - dedi «Nur Otan» partııasy SQOF tóraǵasynyń birinshi orynbasary Ásem Rahmetova.
Byltyr da nurotandyqtar partııalyq baqylaý aıasynda 324 reıd júrgizdi, nátıjesinde birqatar olqylyqtyń betin ashty.
