SQO-da «Questra World» kompanııasynyń jumysy toqtatyldy
ASTANA. QazAqparat - Soltústik Qazaqstan oblysynda "Questra World" kompanııasy fılıalynyń jumysy toqtatyldy. Onyń menedjerleri qarjy pıramıdasyna qatysy bar degen kúdikke iligip otyr, dep habarlaıdy «Astana» arnasy.
Oblystyq ІІD mamandarynyń sózinshe, olar azamattarǵa sheteldik esep-shot ashýǵa usynys jasaǵan. Salǵan qarjyǵa baılanysty karta qojaıynyna 17 paıyzben 26 paıyz aralyǵynda túsim túsip otyrǵan. Tabysyn arttyrý úshin salymshy pıramıdalyq ádispen basqa adamdardy da tartýy kerek bolǵan. Al, kelisimshart negizinde menedjerler salymshy aqshasynyń 50 paıyzyn kez-kelgen ýaqytta sheship alýyna jaǵdaı jasaǵan. Alaıda, mamyr aıynan beri esepter buǵattalyp, qazir 50-ge jýyq soltústik qazaqstandyq azamat aqshasyn ala almaı júr.
«Uıym qyzmeti jeke tulǵalardan kásipkerlik baǵytta emes, jeke paıda boıynsha aqsha tartý isimen aınalysqan. Sondaı-aq, turǵyndardyń salǵan salymynyń arqasynda paıda kórgen. Bul qarjy pıramıdasynyń jumysyna qatty uqsas. Osy sebepterge oraı, jumysyn toqtatý týraly sheshim shyqty»,- dedi SQO ІІD uıymdasqan qylmysqa qarsy kúres bóliminiń basshysy Áset Júkenov.
Esterińizge sala keteıin, "Questra World" kompanııasy kúdikke alǵash iligip otyrǵan joq. Buǵan deıin kompanııa fılıaly jumysy basqa qalalarda da toqtatylǵan bolatyn.
