SQO-da psıhıatrııalyq jáne narkologııalyq anyqtamalar emhanalarda beriletin bolady
PETROPAVL. QazAqparat - Keler jyldan bastap Soltústik Qazaqstan oblysynyń emhanalarynda psıhıkalyq densaýlyq kabınetteri ashylady. Bul jerde psıhıatrııalyq qana emes, narkologııalyq kómek te qosa kórsetiletin bolady, dep habarlaıdy QazAqparat tilshisi.
Buǵan deıin Petropavldaǵy psıhonevrologııalyq jáne narkologııalyq dıspanserler biriktirilip, «Psıhıkalyq densaýlyq ortalyǵy» bolyp qurylǵan edi. Endi, qańtardyń birinen bastap ortalyqtyń bólimsheleri - psıhıkalyq densaýlyq kabınetteri óńirdiń emhanalarynda ashylmaq.
Osyǵan oraı, ortalyqtyń mamandary arnaıy oqytý kýrstarynan ótip, 2019 jyldan Petropavldaǵy 1-shi, 2-shi jáne 3-shi qalalyq emhanalarda jumys isteıtin bolady. Psıhıkalyq densaýlyq ortalyǵynan aýysyp keletin kadrlar úshin emhanalar bólek kabınetter daıyndap jatyr.
«Qańtar aıynan bastap turǵyndarǵa psıhıatrııalyq jáne narkologııalyq kómek ózderi tirkelgen emhanalarda kórsetiledi. Munda standartqa saı, bólek kiretin esigi, tirkeý orny, em-dom kabıneti bolady. Psıhonevrologııalyq jáne narkologııalyq esepte turý-turmaý jónindegi anyqtama da sol emhanalardaǵy kabınette tegin beriledi. Sonymen qatar, narkolog dáriger men psıhıatrdyń mindetterin bir ǵana maman atqarady. Bul ózgerister turǵyndardyń ýaqytyn únemdeýge septigin tıgizbek»,-deıdi Psıhıkalyq densaýlyq ortalyǵy bóliminiń meńgerýshisi Ekaterına Propaşeva.
Munymen qosa, eńbekke jaramdylyq, kólikti júrgizý, qarýdy ustaý jónindegi ruqsat qaǵazdaryn da emhanalardan alýǵa bolady. Ol psıhıatrııalyq, narkologııalyq esepte turmaǵandarǵa ǵana beriledi.
«Narkologııalyq, psıhıatrııalyq esepte turǵandardyń keıbirine avtokólikti basqarý, qarýdy ustaý quqyǵy beriledi. Biraq olar ruqsat qaǵazdaryn emhanalardaǵy psıhıatrlardan emes, Rıjskaıa, 6 meken jaıyndaǵy Psıhıkalyq densaýlyq ortalyǵynan alady. Olarǵa anyqtama berý-bermeý jónindegi sheshimdi emhanalar emes, biz sheshemiz», - deıdi Psıhıkalyq densaýlyq ortalyǵynyń narkologııalyq qyzmet boıynsha bas dárigerdiń orynbasary Elena Smagına.
Sondaı-aq, Psıhıkalyq densaýlyq ortalyǵynyń bólimsheleri jańa jyldan bastap aýdandyq ortalyq emhanalarynda da jumysyn bastaıdy.
