SQO-da psıhdıspanserden qashqan jigit 5 kúnnen keıin Aqmola oblysynan tabyldy

PETROPAVL. QazAqparat – Soltústik Qazaqstan oblysynda psıhıkalyq densaýlyq ortalyǵynan ketip qalǵan 29 jastaǵy jigitti polıtsııa qyzmetkerleri aman-esen tapty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 21 sáýirde Taıynsha aýdanynyń polıtsııa bólimine Taıynsha qalasynyń psıhıkalyq densaýlyq ortalyǵy aýmaǵynan belgisiz baǵytta 29 jastaǵy naýqas adamnyń ketkeni týraly habar tústi.

Polıtseıler izdestirý is-sharalaryn bastady, olarǵa volonterler kómekke kelip, áleýmettik jelilerde foto baǵdarlaýdy taratty.

Jedel-izdestirý is-sharalarynyń nátıjesinde 25-nen 26 sáýirge qaraǵan túni joǵalǵan adamnyń ornalasqan jeri anyqtaldy.

Jigit Aqmola oblysy Marınovka aýylynan tabyldy.

Er adam Taıynsha qalasynan jolǵa shyǵyp, Astanaǵa ketken. Sol jerden alys týystary ony Marınovkaǵa jibergen eken.

26 sáýirde izdeýdegi adam Taıynsha qalasyna aman-esen jetkizilip, psıhıkalyq densaýlyq ortalyǵynyń basshylyǵyna tapsyryldy.

SQO PD krımınaldyq polıtsııa basqarmasynyń aqparaty boıynsha, jyl basynan beri SQO boıynsha polıtseıler habar-osharsyz ketken 12 adamnyń júrgen jerin anyqtady.

Buǵan deıin 29 jastaǵy Rýslan Vasılevıch Şednevke izdeý jarııalanǵanyn aıtqan edik.