SQO-da psıhdıspanserden 4 kún buryn qashyp ketken naýqas tabylmaı jatyr

PETROPAVL. QazAqparat – Soltústik Qazaqstan oblysynda 29 jastaǵy jigit Taıynsha qalasynda ornalasqan psıhıkalyq densaýlyq ortalyǵynan ketip qalǵan. Syrqat tórt kúnnen beri tabylmaı jatyr, dep habarlaıdy QazAqparat tilshisi.

Volonterler áleýmettik jelide 29 jastaǵy Rýslan Vasılevıch Şednevke izdeý jarııalady. Ol 21 sáýir kúni saǵat 10.00 shamasynda Taıynsha qalasyndaǵy psıhıkalyq densaýlyq ortalyǵynan shyǵyp ketken. Jigitke «psıhıkalyq buzylý» dıagnozy qoıylǵan. Boıy 180-182 sm shamasynda. Aryqsha kelgen, qysqa qara shashty.

Ústinde kapıýshony bar kók kúrteshe, qara trıko, báteńke jáne qara tústi bas kıim bolǵan.

Sondaı-aq óńirde Qyzyljar aýdany Chapaev eldi mekeniniń turǵyny Narıman Nurseıitovke de izdeý jarııalandy. 49 jastaǵy er adam 26 naýryz kúni úıinen shyǵyp, oblys ortalyǵyna bet túzegen. Sodan beri habar joq.

Boıy 160-165 sm shamasynda, dene bitimi ortasha kelgen, shashy qysqa, seldir, qara tústi.

Sol kúni ústinde qara kúrteshe, qara-kók tústi djıns shalbar jáne qara bas kıim bolǵan.

Joǵalǵan adamdar jaıynda qandaı da bir málimet bolsa 8 926 62664 33, 8 777 307 99 65 nemese 102 nómirine habarlasýǵa bolady.

Buǵan deıin izdeýde bolǵan Elena Mıronıýk aman-esen tabylǵanyn jazǵan edik.