SQO-da prokýrorlardyń aralasýynan keıin 30 shaqty ınvestordyń máselesi oń sheshildi

PETROPAVL. KAZINFORM — Soltústik Qazaqstan oblysynda prokýratýra ınvestıtsııalyq jobalardy iske asyrýǵa belsendi qoldaý kórsetip keledi. 

SQO prokýratýrasynyń málimetinshe, memlekettik organdardan prokýratýraǵa ınvestorlarǵa qatysty tyıym salý-shekteý sıpatyndaǵy 120 materıal kelip tústi. Nátıjesinde 40 jaǵdaıda ákimshilik qysym kórsetýge, eki zańsyz tekserýge jol berilmedi.

Bıyl 226,5 mlrd teńge somasyna ınvestıtsııa salýdy jáne 2 893 jumys ornyn qurýdy josparlap otyrǵan 34 ınvestordyń 20 problemasy oń sheshimin tapty.

Máselen, «Taıynsha Maı» JShS-ge polıtsııa qyzmetkerleri taǵaıyndaý jáne quqyqtyq statıstıka organdarynda mindetti tirkeý týraly akt shyǵarmaı zańsyz tekserý júrgizgen. Kásipkerlik qyzmetke zańsyz aralasý faktisi boıynsha Taıynsha aýdany polıtsııa bólimi bastyǵynyń orynbasary jáne ýchaskelik ınspektor tártiptik jaýapkershilikke tartyldy.

Al, «SevKazEnergo» AQ oblys prokýratýrasynyń front-ofısine aryzdanyp, ákimshilik quqyq buzýshylyq týraly is boıynsha 590 myń teńge somasyna is júrgizý toqtatyldy.

Sondaı-aq, oblys prokýratýrasynyń aralasýynan keıin Petropavl qalasy ákimdigi «SMBGROUP Family» JShS-ge 1 mln teńgeden astam qaryzyn qaıtardy. Kásipker polıpropılen qaptarymen qamtamasyz etken. Alaıda jergilikti atqarýshy organnyń rezervinde aqshanyń bolmaýy sebebinen shart qazynashylyq organdarynda tirkelmegen eken.

Oblys prokýrorlarynyń aıtýynsha, qazir jalpyulttyq pýlǵa sáıkes oblys aýmaǵynda jalpy somasy 781,9 mlrd teńgeden astatyn 51 ınvestıtsııalyq joba júzege asyrylyp jatyr, nátıjesinde shamamen 7 200 jumys orny qurylatyn bolady. Óńirlik pýlda 9,1 mlrd teńge somasyna 49 joba bar.

Buǵan deıin SQO-da esh jerde esepte joq 9 myń ga orman alqaby anyqtalǵanyn jazǵan edik.