SQO-da prokýrorlar ótken jyly 53,5 myń adamnyń quqyǵyn qorǵady

PETROPAVL. QazAqparat – Soltústik Qazaqstan oblysynda prokýrorlar byltyr 132 tekserý, 309 taldaý júrgizip, myńǵa jýyq zań buzýshylyqty anyqtady. Jalpy 53,5 myń adamnyń quqyǵy qorǵalsa, 561 adam ártúrli jaýapkershilikke tartyldy, dep habarlaıdy QazAqparat tilshisi.

SQO prokýratýrasy baspasóz qyzmetiniń málimetinshe, oblys prokýrory Baǵban Taıymbetov alqa otyrysynda ótken jyldy qorytyndylady. Máselen tekserýler barysynda anyqtalǵan 909 zań buzýshylyqtyń 542-si joıyldy.

Qadaǵalaý aktileri boıynsha 621 mln teńge óndirilse, sonyń ishinde 387,5 mln teńgesi memlekettik kiris retinde alyndy. Budan basqa 708 mln teńgeniń múlki qaıtarylǵan.

«Negizgi zań buzýshylyqtar memlekettik satyp alý, qurylys, densaýlyq saqtaý, aýyl sharýashylyǵy, monopolııaǵa qarsy, zeınetaqy zańnamasy salasynda anyqtaldy.

Qadaǵalaý aktileri boıynsha memlekettik satyp alý salasynda 3,5 mlrd teńgeden astam somaǵa 15 konkýrstyń nátıjesi joıyldy.

Máselen, Petropavl qalasynyń ákimdigi 2,8 mlrd teńge somasyna «Kopaı» shaǵyn aýdanynyń qurylysy boıynsha memlekettik satyp alý júrgizdi.

Alaıda tapsyrys berýshide ruqsat qujattary, atap aıtqanda jerge tıisti quqyq berý týraly sheshim bolmaǵan.

Qadaǵalaý aktisi boıynsha bul konkýrs joıyldy, osylaısha 2,8 mlrd teńge bıýdjet qarajatynyń negizsiz jumsalýyna jol berilmedi», - delingen baspasóz habarlamasynda.

Al mobıldik toptar kásipkerlerdiń quqyǵyn buzýǵa qatysty myńnan astam faktiniń aldyn aldy. Prokýrorlar bıznes sýbektilerin zańsyz tekserýdiń 9 deregin anyqtady, onyń ishinde 5-niń jolyn kesti, 4-i joıyldy, 1144 bıznes sýbektisiniń quqyqtary qalpyna keltirildi.