SQO-da prokýrorlar qumar oıynǵa qunyqqan memlekettik qyzmetshilerdi jumystan shyǵardy

ASTANA. KAZINFORM – Soltústik Qazaqstan oblysynyń prokýrorlary memlekettik qyzmetshilerdi qumar oıyndary úshin jumystan shyǵardy, dep habarlaıdy oblystyq prokýratýranyń baspasóz qyzmeti.

Ótken jylǵy shildede «Sybaılas jemqorlyqqa qarsy is - qımyl týraly» Qazaqstan Respýblıkasynyń Zańyna (budan ári-Zań) tolyqtyrýlar engizildi, soǵan sáıkes memlekettik qyzmetshilerge qumar oıyndar oınaýǵa tyıym salynady, áıtpese olar teris sebeptermen jumystan shyǵarylady.

Taldaý sheńberinde memlekettik qyzmetshilerdiń qumar oıyndarǵa qatysýy boıynsha sybaılas jemqorlyqqa qarsy shekteýlerdi saqtamaý faktileri anyqtaldy.

Máselen, Aqjar aýdany ákimdiginiń qurylys jáne sáýlet bóliminiń bas mamany Zań talaptaryn buza otyryp, «1XBET» býkmekerlik keńsesinde júıeli negizde «stavkalar» qoıyp kelgen.

Osyndaı jaǵdaı Uıaly aýyldyq okrýgi ákimi apparatynyń jáne Aqjar aýdanynyń bilim bóliminiń bas mamandaryna qatysty anyqtaldy.

Prokýrorlyq qadaǵalaý aktileri boıynsha joǵaryda atalǵan laýazymdy adamdar jumystan bosatyldy, barlyq memlekettik qyzmetshilerge sybaılas jemqorlyqqa qarsy shekteýlerdiń qatań saqtalatyny kórsetildi.

Qadaǵalaý organy memlekettik qyzmetshilerge sybaılas jemqorlyqqa qarsy shekteýlerdi saqtamaǵany úshin jumystan bosatý túrindegi tártiptik jaýaptylyq týraly eske salady jáne qoldanystaǵy zańnamanyń talaptaryn saqtaýǵa shaqyrady.

Osyǵan deıin Mańǵystaý oblysynda 2022-2023 jyldary kompıýterlik zal atyn jamylyp zańsyz qumar oıyn bıznesin uıymdastyrǵan qylmystyq toptyń áreketi toqtatatylǵany týraly jazdyq.