SQO-da prokýratýranyń mobıldi tobyna byltyr kásipkerlerden 79 qońyraý tústi
Óńirlik kommýnıkatsııalar qyzmetinde «Bıznes sýbektileriniń quqyqtaryn qorǵaý – prokýratýra organdary jumysynyń negizgi basymdyǵy» atty brıfıng ótti.
SQO prokýratýrasy qoǵamdyq múddelerdi qorǵaý basqarmasynyń aǵa prokýrory Tımýr Qurtaevtyń aıtýynsha, prokýratýra organdary kásipkerler palatasymen birlesip, bıznes sýbektileriniń qatysýymen turaqty negizde qoǵamdyq keńester ótkizedi. Maqsat - problemalyq máselelerdi talqylap, qoldanystaǵy zańnamalar boıynsha túsinikteme berý, kásipkerlerdiń quqyqtaryn qorǵaý jónindegi mobıldik top telefondaryna kelip túsken ótinish-aryzdardy qaraý. Osylaısha byltyr 12 qoǵamdyq keńes ótkizilip, 16 problemalyq másele qaraldy, olardyń barlyǵy sheshildi.
«Oblys prokýratýrasynda kásipkerlerdiń quqyqtaryn qorǵaý boıynsha mobıldi top táýlik boıy jumys isteıdi, olar óńirlik kásipkerler palatasymen ózara áreket etedi. Mobıldi toptyń telefondary oblys prokýratýrasynyń, jergilikti atqarýshy organdardyń resmı saıttarynda, sondaı-aq buqaralyq aqparat quraldary men áleýmettik jelilerde jarııalanǵan. Byltyr kásipkerler quqyqtarynyń buzylǵandyǵy týraly 79 sıgnal kelip tústi, onyń ishinde tekserý nátıjeleri boıynsha 33-i rastaldy, 32-si jalǵan bolyp shyqty, 14 sıgnal boıynsha túsiniktemeler berildi. Nátıjesinde kásipkerlerdiń quqyqtaryn qorǵaý maqsatynda 24 qadaǵalaý aktisi engizildi, 15 tulǵa tártiptik jaýapqa tartyldy, 6 zańsyz tekserýdiń kúshi joıyldy, josparlanǵan 7 tekserý zańdy emes dep tanyldy», - deıdi Tımýr Qurtaev.
Osylaısha 3,5 myńnan astam bıznes sýbektisiniń quqyǵy qorǵaldy.
«Jergilikti atqarýshy bıliktiń 4 kásipkerge qatysty jospardan tys zańsyz ótkizbek bolǵan tekserýleri toqtatyldy. Sondaı-aq bıznes sýbektisiniń qurylysyn zańsyz toqtatqany belgili boldy, prokýrorlardyń aralasýynan keıin ol jumysyn jalǵastyrdy. Bıyl mobıldi topqa jyl basynan beri kásipkerlerden 11 qońyraý tústi. Onyń 3-eýi rastaldy, 4-eýi rastalmady, qalǵany boıynsha túsindirý jumystary júrgizildi. Nátıjesinde 9 qadaǵalaý aktisi engizilip, 2 tulǵa jaýapqa tartyldy», - deıdi prokýror.