SQO-da prokýratýra jumyspen qamtý salasynda birqatar zańbuzýshylyqtardy anyqtady

PETROPAVL. QazAqparat – Soltústik Qazaqstan oblysynda prokýratýra jumyspen qamtý máselesimen aınalysatyn jergilikti atqarýshy organdy tekserip, qorytyndysyn shyǵardy, dep habarlaıdy QazAqparat tilshisi.

SQO prokýratýrasy baspasóz qyzmetiniń málimetinshe, tekseristiń qorytyndysy vedomstvoaralyq keńestiń otyrysynda jarııa etildi.

Prokýrorlar jumyspen qamtýǵa qatysty ákimdikterdi tekserý nátıjesinde kóptegen bylyqtyń beti ashylyp otyr. Máselen, qysqa merzimdi oqytý, jumysqa ornalastyrý qaǵaz júzinde uıymdastyrylǵan. Bıznes bastamalardy qoldaýǵa bólingen maqsatty granttar ıgerilmegen. Al jumyspen qamtý ortalyqtary óz isine salǵyrt qaraǵan baǵdarlama qatysýshylaryna qatysty shaǵymdanbaǵan.

«Tekserý nátıjeleri boıynsha jumyspen qamtý ortalyqtarynyń basshylaryn qatań tártiptik jaýapqa tartý jáne memlekettik bıýdjetke 38 mln teńgeni qaıtarý týraly másele kóterildi. Zańbuzýshylyqtardy joıý týraly qadaǵalaý aktileri engizildi», - delingen baspasóz habarlamasynda.

Oblys prokýrorlary óńir turǵyndarynyń áleýmettik quqyqtaryn qorǵaý máselesin turaqty baqylaýda ustap otyr.