SQO-da prokýratýra memleket menshigine 20 jer ýchaskesin qaıtardy
PETROPAVL. KAZINFORM – Soltústik Qazaqstan oblysynyń prokýrorlary jer qatynastary salasyna taldaý júrgizip, óreskel zań buzýshylyqtardy anyqtady.
SQO prokýratýrasynyń málimetinshe, ákimdikter jer ýchaskelerin konkýrstan tys zańsyz bergen, keı jer uzaq ýaqyt paıdalanylmasa da shara qoldanylmaǵan, sondaı-aq menshik quqyǵy úshin tólem jasalmaǵan.
Mysaly, Esil, Ýálıhanov, Shal aqyn, Tımırıazev aýdandary men Petropavl qalasynyń jer paıdalanýshylary QR Jer kodeksiniń 92-babyn buzyp, jalpy aýmaǵy 8,5 myń ga bolatyn 65 jer ýchaskesin uzaq ýaqyt boıy paıdalanbaǵan. Osyǵan qaramastan jergilikti atqarýshy organdardyń laýazymdy adamdary bul jerlerdi alyp qoıý úshin tıisti shara qoldanbaǵan.
Aıyrtaý aýdany ákimdigi men Petropavl qalasy jer qatynastary bólimderiniń laýazymdy tulǵalary QR Azamattyq kodeksine saı jasalǵan kelisimder boıynsha jer paıdalanýshylardan bereshekti óndirip alýǵa áreket etpegen. Saldarynan menshik jáne jalǵa alý quqyǵyn satyp alý úshin olardyń qaryzy 94 mln teńgege jetken.
Sondaı-aq Petropavl qalasy ákimdiginiń jer qatynastary bólimi jeke jáne zańdy tulǵalarǵa konkýrstan tys 6 jer telimin bergen.
Qadaǵalaý organynyń aktileri boıynsha 6 laýazymdy tulǵa, onyń ishinde Petropavl qalasynyń jer qatynastary bóliminiń basshysy tártiptik jaýapkershilikke tartyldy, memleketke keltirilgen zalal - 44 mln teńge óteldi, jalpy kadastrlyq quny 180 mln teńgeden asatyn 20 jer ýchaskesi memleket menshigine qaıtaryldy.
Buǵan deıin SQO-da balasyna alıment tólemegen 36 ata-ananyń qamalǵanyn aıtqan edik.
