SQO-da prokýratýra 6,5 myńnan astam qyzmetkerdiń memlekettik bazada tirkelmegenin anyqtady
PETROPAVL. KAZINFORM - Soltústik Qazaqstan oblysyndaǵy 1 837 kásiporyn eńbek zańnamasynyń talaptaryn oryndamaǵan.
Bul oblys prokýratýrasy júrgizgen taldaý nátıjesinde anyqtaldy. Mekemeler óz qyzmetkerleri týraly málimetterdi Eńbek sharttaryn esepke alýdyń biryńǵaı júıesine engizbegen.
Tekserý barysynda bul kásiporyndardyń 6 517 qyzmetkeriniń eńbek sharttary tsıfrlyq júıede tirkelmegeni belgili boldy. Alaıda olar is júzinde jumys istep, mindetti zeınetaqy jarnalary men áleýmettik aýdarymdar turaqty túrde tólenip otyrǵan. Soǵan qaramastan, memlekettik eńbek bazasynda olardyń eńbek mártebesi resmı túrde kórsetilmegen.
Prokýratýranyń málimetinshe, eńbek qatynastaryn esepke alý tártibiniń oryndalmaýy, qyzmetkerlerdiń eńbek quqyqtarynyń buzylýyna da ákelýi múmkin.
Eske salsaq, qujattardy elektrondyq formatqa kóshirý merzimi 2020 jyly bekitilip, ol áldeqashan aıaqtalǵan. Al bıyl 12 naýryzdan bastap Qazaqstanda osy biryńǵaı júıede eńbek sharttary týraly málimetterdiń bolmaýy úshin ákimshilik jaýapkershilik engizildi.
Zań talaptaryn oryndamaǵan jumys berýshilerge aıyppul qarastyrylǵan. Shaǵyn bıznes sýbektileri men kommertsııalyq emes uıymdarǵa 60 AEK - 259 500 teńge, orta bızneske 80 AEK - 346 000 teńge, al iri kásiporyndarǵa 150 AEK - 648 750 teńge mólsherinde aıyppul salynady. Qaıtalanǵan jaǵdaıda aıyppul mólsheri 80-nen 200 AEK-ke deıin ulǵaıady.
Anyqtalǵan zań buzýshylyqtarǵa baılanysty oblystyq prokýratýra Memlekettik eńbek ınspektsııasyna resmı nusqama joldap, barlyq 1 837 kásiporyndy habardar etýdi jáne kemshilikterdi shuǵyl túrde joıý sharalaryn qabyldaýdy tapsyrdy. Sondaı-aq eńbek zańnamasyn túsindirý jumystaryn kúsheıtý qajettigi aıtyldy.
Buǵan deıin Qazaqstannyń jeńil ónerkásibinde 18 myńnan astam adam eńbek etetinin jazǵan edik.
