SQO-da probatsııalyq esepte turǵandar óz kásipterin ashyp jatyr
PETROPAVL. QazAqparat – Soltústik Qazaqstan oblysynda probatsııa qyzmetiniń esebinde turǵan sottalǵandardyń 23-i byltyr «Bastaý» baǵdarlamasy arqyly kásipkerliktiń qyr-syryn meńgerdi, dep habarlaıdy QazAqparat tilshisi.
SQO-da búginde isti bolǵan 1025 adam probatsııa qyzmetiniń esebinde tur. Olardyń 23-i byltyr kásipkerler palatasynda «Bastaý» baǵdarlamasy arqyly bir aılyq kýrstan ótti. Altaýy bastaǵan isti sońyna deıin jetkizip, óz jobalaryn qorǵady, nátıjesinde qaıtarymsyz grant aldy.
Maǵjan Jumabaev atyndaǵy aýdanda jaqynda klınıngtik qyzmet ashyldy. Aýdan ortalyǵy Býlaevta buryn mundaı qyzmet bolmaǵandyqtan turǵyndar tarapynan suranys joǵary. Kásipti Aleksandr Slabodenıýk ashyp otyr. Ol osydan eki jyl buryn shalys basyp, 5 jylǵa shartty túrde bas bostandyǵynan aıyryldy. Jumyssyz júrgen Aleksandrǵa probatsııa qyzmetiniń mamandary «Bastaý» baǵdarlamasyna qatysýǵa usynys tastaıdy. Bir aıdyń ishinde kásip ashýdyń negizderin úırengen ol sertıfıkat, keıin jobasyn qorǵap, grant aldy.
«Kásip ashyp, otbasymdy asyrap otyrmyn. Kólik salonyn, jumsaq jıhazdy, matrastardy hımııalyq jolmen tazartamyn. Mundaı qyzmet túri buryn aýdanda bolmaǵan. Qazir aýyldardan, basqa aýdandardan tapsyrystar túsip jatyr», - deıdi kásipker.
SQO Qylmystyq atqarý júıesi departamenti mamandarynyń aıtýynsha, bıyl da sottaǵandarǵa quqyqtyq kómek kórsetý jumystary jalǵasady. Nıet bildirgender arnaıy baǵdarlamalar boıynsha tegin oqýǵa jiberilmek.
«Aýmaqtyq probatsııa qyzmeti mamandary men «Atameken» UKP bul jobany eki jyldan artyq júzege asyryp keledi. Sottalǵan, esepte turǵan azamattar «Bastaý» baǵdarlamasy boıynsha 1 aı tegin oqytý kýrstarynan ótedi. 2017– 2019 jyldar aralyǵynda 30-dan astam adam kásip úırenip, sertıfıkat aldy», - deıdi SQO QAJD probatsııa qyzmetiniń bas mamany Rýslan Júsipov.
Memlekettik baǵdarlama aıasynda kásip ashqandar negizinen mal basyn kóbeıtip, qus sharýashylyǵyn damytyp jatyr. Sondaı-aq qyzmet kórsetý, saýda-sattyq salalaryn da tańdaıdy eken.
