SQO-da probatsııalyq baqylaýdaǵylar bıoskanerden ótedi
Soltústik Qazaqstan oblysy boıynsha Qylmystyq atqarý júıesi departamenti baspasóz qyzmetiniń málimetinshe, probatsııa qyzmetiniń esebinde turǵan adamdar qylmysqa qaıta barmas úshin jáne sotpen júktelgen mindetterdi oryndatý maqsatynda olar únemi baqylaýda bolady. Al bul jumysty jeńildetý úshin QAJD, SQO prokýratýrasy jáne Petropavl ákimdigi birlesip, Petropavl qalasynyń probatsııa qyzmeti bóliminiń ǵımaratyna bıometrııalyq skaner ornatty.
Qazirgi ýaqytta Petropavl qalasynyń probatsııa qyzmetiniń esebinde qoǵamnan oqshaýlaýsyz jazasyn ótep jatqan 398 adam tur. Olar kún saıyn tirkeýden ótedi. Mamandar kúndelikti derekqor bazasyna saýalnama málimetterin, turǵylyqty jeriniń mekenjaıyn, baılanys telefondaryn jáne bet pen saýsaq izi skanerin engizedi.
«Bıometrııalyq tehnologııalar bir adamǵa ǵana tán erekshe sıpattamalardy ólsheýge negizdelgen. Petropavl qalasynyń probatsııa qyzmetinde saýsaq izin ıdentıfıkatsııalaý boıynsha bıometrııalyq skaner ornatylǵan. Saýsaǵyn skanerge qoıý arqyly sottalǵan adam probatsııa qyzmetine kelgen ýaqytyn avtomatty túrde tirkeıdi. Burynǵydaı qaǵaz toltyrýdyń qajeti joq», - deıdi SQO boıynsha QAJD Petropavl qalasy probatsııa qyzmeti bóliminiń aǵa ınspektory Gúljan Táshkenova.
