SQO-da polıaktar kóp qonystanǵan eldi mekende «Qazaq halqyna alǵys» estelik belgisi qoıyldy
PETROPAVL. KAZINFORM – Qazaqstanǵa polıaktardyń jer aýdarylǵanyna bıyl 90 jyl tolyp otyr.
Resmı málimetterge sáıkes, 1936 jyldan bastap Soltústik Qazaqstan oblysyna 21 myńnan astam polıak jer aýdarylǵan. Olardyń basym bóligi Taıynsha aýdanyna qonystanǵan. Qazirgi tańda óńirde 10 myńnan astam etnıkalyq polıak turady. Osylaısha óńir Qazaqstandaǵy polıak dıasporasy eń kóp shoǵyrlanǵan aımaq retinde erekshelenedi.
Óńirge Polsha Respýblıkasy Senatynyń Marshaly Malgojata Kıdava-Blonska bastaǵan resmı delegatsııa kelip, Taıynsha aýdanynda boldy.
- Qazaqstan men Polshany 34 jyldan astam ýaqytqa sozylǵan berik dıplomatııalyq qarym-qatynas baılanystyrady. Osy kezeńde eki el arasynda saıası, saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyq nyǵaıyp, ózara senim men dostyqqa negizdelgen seriktestik qalyptasty. Bul sapardyń bizdiń oblys úshin mańyzy erekshe. Óńirimiz ben Polshany tarıh pen tereń rýhanı baılanystar biriktiredi. Búginde Qazaqstandaǵy etnıkalyq polıaktardyń 30 % astamy bizdiń oblysta turady, - dedi qonaqtardy qarsy alǵan oblys ákimi Ǵaýez Nurmuhambetov.
Sapar aıasynda Polsha delegatsııasy Taıynsha aýdanynda polıaktardyń Qazaqstanǵa jer aýdarylǵanyna 90 jyl tolýyna arnalǵan eske alý is-sharasyna qatysty. Bul kúni qazaq halqynyń qıyn-qystaý kezeńderde kórsetken janashyrlyǵy, keńpeıildigi, qonaqjaılyǵy men adamgershiligine degen shynaıy rızashylyqtyń belgisi retinde «Qazaq halqyna alǵys» atty estelik belgi saltanatty túrde ashyldy.
Esterińizge salaıyq, soǵys kezinde Qyzylordada polıak mektebi men balabaqshasy jumys istegen bolatyn.
