SQO-da polıtsııa toqtatqan júk kólikteriniń ár ekinshisinde artyq salmaq bolǵan
PETROPAVL. KAZINFORM – Soltústik Qazaqstan oblysynda polıtseıler reıd aıasynda 7 aýyr júk kóligin toqtatyp, onyń 4-eýinen artyq salmaq anyqtaldy.
SQO Polıtsııa departamenti baspasóz qyzmetiniń málimetinshe, qazir «Quqyqtyq tártip» jedel-profılaktıkalyq is-sharasy aıasynda jol qaýipsizdigin qamtamasyz etý jumystary kúsheıgen. Ózekti máselelerdiń biri – aýyr júk kólikteriniń belgilengen salmaq normalaryn saqtamaýy.
«Ońtústik» baqylaý beketinde ınertti materıaldardy shamadan tys artqan tórt kólik ıeleri jaýapqa tartyldy.
- Kólikke tıelgen artyq salmaq joldaǵy qaýip-qaterdi arttyrady. Kólikti basqarýdy qıyndatyp, tejeý jolyn uzartady, - deıdi tártip saqshylary.
Ákimshilik polıtsııanyń málimetinshe, bıylǵy toǵyz aıda SQO-da júk kólikteriniń júrgizýshileri kesirinen bolǵan 24 jol-kólik oqıǵasy tirkeldi. Saldarynan 5 adam mert bolyp, 25 adam jaraqat aldy.
Qańtardan qyrkúıekke deıin oblysta barlyq jol-kólik oqıǵalary saldarynan 30 adam kóz jumdy. ıAǵnı, jol-kólik oqıǵalarynan mert bolǵandardyń árbir altynshysy júk kóligi júrgizýshileriniń kinásinen kóz jumǵan.
Buǵan deıin Petropavl-Kókshetaý jolynda bes kólik soqtyǵysyp, úsh adam kóz jumǵanyn jazǵan edik.
Keıin eki júk kóliginiń arasynda qystyrylyp qalǵan Audi avtokóliginiń taǵy bir jolaýshysy qaza boldy.
