SQO-da polıtsııa qylmystyń sebepterin joıýǵa baǵyttalǵan 1446 usynys joldady
ASTANA. KAZINFORM — SQO-da polıtsııanyń usynysynan keıin beınekameralar ornatylyp, qaýipsizdik kúsheıtildi, dep habarlaıdy Polisia.kz.
Qylmystyń aldyn alý oǵan yqpal etetin sebepter men jaǵdaılardy joıýdan bastalady. Osy maqsatta polıtsııanyń tergeýshileri men anyqtaýshylary qylmystyq isterdi tergeý barysynda quqyq buzýshylyqtyń jasalýyna yqpal etken sebepter men jaǵdaılardy anyqtap, olardy joıý jóninde sharalar qabyldaý týraly memlekettik organdar men uıymdardyń atyna júıeli túrde usynystar engizedi. Bul rásim Qazaqstan Respýblıkasy Qylmystyq-protsestik kodeksiniń 200-babynda kózdelgen.
Jyl basynan beri Soltústik Qazaqstan oblysy polıtsııa departamenti 1446 usynys engizdi. Onyń 1368-i boıynsha tıisti sharalar qabyldandy. Usynystardy qaraý nátıjeleri týraly habarlamaǵany úshin 16 adam ákimshilik jaýapkershilikke tartyldy, taǵy 155 laýazymdy tulǵa tártiptik jaýapkershilikke tartyldy.
— Usynystardy qaraý nátıjesinde óńirde 26 beınebaqylaý kamerasy ornatyldy, toǵyz nysanda qaýipsizdik sharalary kúsheıtildi, úsh jol belgisi qoıyldy, jol tańbalary jańartyldy jáne qosymsha kóshelik jaryqtandyrý uıymdastyryldy. Sonymen qatar eki qyzmetkermen eńbek sharttary buzylyp, bilim berý uıymdarynda bes profılaktıkalyq is-shara ótkizildi, al jeti adam ákimshilik jaýapkershilikke tartyldy, — delingen habarlamada.
Polıtsııa departamentinde atap ótkendeı, tergeýshiler men anyqtaýshylardyń qylmystyń jasalýyna yqpal etetin sebepter men jaǵdaılardy anyqtaý jáne olardy der kezinde joıý baǵytyndaǵy jumysy jańa quqyq buzýshylyqtardyń aldyn alýǵa jáne Soltústik Qazaqstan oblysy turǵyndarynyń qaýipsizdigin arttyrýǵa múmkindik beredi.
Buǵan deıin Aqmola men SQO-da jol qurylysy mamandary paramen ustalǵanyn jazǵanbyz.
