SQO-da polıtseıler joldardaǵy adam óliminiń negizgi sebepterin atady
PETROPAVL. KAZINFORM — Soltústik Qazaqstan oblysynda bıyl 362 jol-kólik oqıǵasy tirkelse, onyń 103-inde júrginshiler zardap shekken.
SQO Polıtsııa departamenti baspasóz qyzmetiniń málimetinshe, bıyl jol-kólik oqıǵalarynda 28 adam mert boldy, sonyń altaýy — júrginshi.
Tártip saqshylary turǵyndardy joldy tek belgilengen jerden ǵana kesip ótý qajet ekenin eske salady. Mindetti túrde júrgizýshiniń sizdi kórip, ótkizip turǵanyna kóz jetkizý kerek. Joldy kesip ótkende kapıýshon kıip, qulaqqap taǵýdyń óte qaýipti ekendigin eskertedi.
Joldardaǵy apatty azaıtý maqsatynda polıtseıler 15-30 qyrkúıek aralyǵynda «Qaýipsiz jol» jedel-profılaktıkalyq is-sharasyn ótkizip jatyr. Patrýldik polıtsııanyń narıadtary kúsheıtilip, avtomatty beınetirkeý quraldary, sonyń ishinde jasyryn patrýldeý belsendi qoldanylǵan.
Іs-sharanyń alǵashqy kúninde jol qozǵalysy erejelerin buzýdyń 249 deregi anyqtaldy. Onyń ishinde qaýipsizdik beldigin taqpaýdyń 48 deregi tirkeldi. 12 júrgizýshi jaıaý júrginshilerge jol bermegen, 8 júrgizýshi manevr jasaý erejesin buzǵan. Jol-kólik oqıǵalaryna jasalǵan taldaý boıynsha, bul — joldaǵy adam óliminiń negizgi sebepteriniń biri. Jyl basynan beri manevr jasaý erejesin buzý 11 adamnyń ómirin qıdy.
Respýblıkalyq mańyzy bar trassalardaǵy qozǵalys erekshe nazarǵa alynǵan. Óńirdegi ólimmen aıaqtalǵan jol apattarynyń jartysynan astamy dál osy joldarda tirkelgen. Polıtseıler tek ereje buzýshylyqtardy anyqtap qana qoımaı, profılaktıkalyq túsindirý jumystaryn júrgizip, jyldamdyqty asyrmaý, sharshaǵan kúıde kólik júrgizbeý qajettigin eskertip jatyr.
Buǵan deıin SQO-da úsh kúnde 18 mas júrgizýshi ustalǵanyn jazǵan edik.