SQO-da polıtseıler sheteldik nómirli avtokólikterdi tekserip jatyr
Soltústik Qazaqstan oblysynda polıtseıler shetelde tirkelgen avtokólik ıeleriniń negizinen qandaı quqyq buzýshylyqqa jol beretinin aıtty, dep habarlaıdy Kazinform.
Qazaqstan zańnamasynyń talaptaryna sáıkes kelmeıtin shetelde tirkelgen avtokólik quraldaryn paıdalanýǵa tyıym salynǵan.
SQO Polıtsııa departamenti baspasóz qyzmetiniń málimetinshe, óńir polıtseıleri kún saıyn sheteldik nómirleri bar avtokólikter boıynsha reıdter júrgizip jatyr.
Tártip saqshylary júrgizýshi kýálikterin, tehnıkalyq pasporttardy jáne basqa da quqyq belgileıtin qujattardy tekseredi. Reıdterdiń barysynda barlyǵy 432 avtokólik tekserildi.
Quqyq buzýdyń 43 deregi anyqtaldy. Jıi jasalatyn zańbuzýshylyqtar - merzimi ótken saqtandyrý, tehnıkalyq baıqaýdan ýaqtyly ótpeý.
"Bul jumys turaqty negizde júrgiziledi jáne QR Іshki ister mınıstrliginiń baqylaýynda. Mundaı reıd júrgizýdegi maqsat - sheteldik esepte turǵan avtokólikterdiń QR zańnamasynyń talaptaryn saqtaýy. Bul ásirese tranzıttik avtotrafıgi joǵary shekaralas aımaqta ózekti", - deıdi SQO PD Jergilikti polıtsııa qyzmeti basqarmasy bastyǵynyń orynbasary Grıgorıı Tysh.
Jyl basynan beri SQO aýmaǵynda sheteldik esepke alynǵan avtokólikterdiń qatysýymen 34 jol-kólik oqıǵasy tirkeldi, sonyń saldarynan 7 adam qaza taýyp, 52 adam jaraqat aldy.
