SQO-da polıtseıler reıdke shyǵyp, mas júrgizýshilerdi anyqtap jatyr

PETROPAVL. KAZINFORM – Soltústik Qazaqstan oblysynda 19 sáýirden bastap polıtseıler «Qaýipsiz jol» respýblıkalyq jedel-profılaktıkalyq is-sharasyn júrgizip jatyr.

SQO polıtsııa departamenti baspasóz qyzmetiniń málimetinshe, Tımırıazev aýdanynda polıtseıler tekserý úshin eki «BUHLER» traktoryn toqtatty. Júrgizýshilerden spırttik ishimdiktiń ıisi shyqqan. Medıtsınalyq kýálandyrý olardyń alkogoldik mas kúıde ekenin kórsetti. 38 jáne 27 jastaǵy er adamnyń ekeýi de ákimshilik jaýapkershilikke tartyldy.

- Kólik quraldaryn mas kúıde júrgizýge jol berilmeıdi. Mas adamdar óz ómiri men densaýlyǵyna qaýip tóndirip qana qoımaı, jol qozǵalysynyń basqa qatysýshylaryna da tikeleı qaýip tóndiredi. 4 kún ishinde oblys joldarynan 25 mas júrgizýshi ustaldy, - deıdi tártip saqshylary.

Polıtsııa qyzmetkerleri júrgizýshilerdi qarapaıym qaýipsizdik sharalaryn saqtaýǵa: qaýipsizdik beldigin paıdalanýǵa, telefonǵa alańdamaýǵa, jaryq shamdaryn qosyp júrýge shaqyrady. Bul qarapaıym áreketter arqyly densaýlyqty da, ómirdi de saqtap qalýǵa bolady.

Buǵan deıin Petropavlda jasóspirim qaǵyp qulatqan soǵys ardageriniń aýrýhanaǵa jatqyzylǵanyn jazǵan edik.