SQO-da polıtseıler qatty boranǵa baılanysty jolǵa shyqpaýdy eskertip jatyr
PETROPAVL. KAZINFORM – Soltústik Qazaqstan oblysynda qolaısyz aýa raıyna baılanysty birneshe baǵyt boıynsha joldar jabyldy.
Óńirde qatty jel turyp, arty boranǵa ulasty. Saldarynan joldardy qar alyp, avtokólikterdiń qozǵalysyn qıyndatty.
SQO polıtsııa departamenti baspasóz qyzmetiniń málimetinshe, qolaısyz aýa raıyna baılanysty 6 qańtar kúni saǵat 07:30-dan bastap oblystyń ońtústiginde, Taıynsha aýdanynda, jaýapty organdarmen kelisim boıynsha jaǵdaı jaqsarǵanǵa deıin aýdandyq mańyzy bar barlyq avtojolda qozǵalys ýaqytsha toqtatyldy.
Qazir bul baǵytta patrýldik polıtsııa batalonynyń jumysyn polıtsııa departamentiniń basshylyǵy tikeleı úılestirip otyr. Al saǵat 11:00-degi jaǵdaı boıynsha SQO aýmaǵynda «Astana – Petropavl» (Petropavl qalasynan Aqmola oblysynyń shekarasyna deıin), «Ekaterınbýrg – Almaty» (Ǵabıt Músirepov atyndaǵy aýdan), «Kókshetaý – Rýzaevka» (Aıyrtaý aýdany), «Jezqazǵan – Petropavl» (Ǵabıt Músirepov atyndaǵy aýdannyń Toqsan bı aýylynan Aqmola oblysynyń shekarasyna deıin) avtojoldary jabylǵan.
Polıtsııa departamenti men tótenshe jaǵdaılar qyzmeti óńir turǵyndary men qonaqtaryn aýa raıyna qatysty SMS-habarlamalardy qadaǵalap otyrýǵa, sondaı-aq boran men aıaz kezinde jolǵa shyqpaýǵa shaqyrady.
Buǵan deıin 16 oblysta aýa raıyna baılanysty eskertý jarııalanǵanyn jazǵan edik.