SQO-da polıtsııa balyqshy men onyń 14 jastaǵy ulyn qutqardy
PETROPAVL. QazAqparat – Soltústik Qazaqstan oblysynda tártip saqshylary boranda jolda qalǵan 20 adamǵa kómek kórsetti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, tórt avtokólikke mingen Jambyl aýdany Blagoveşenka eldi mekeniniń turǵyndary túnde Aıtýar aýylynyń mańynda jolda qalady. Olar Ǵabıt Músirepov aýdanynan úılerine qaıtyp kele jatqan. Kóliktiń birinde kishkentaı bala bolǵan. Qar alǵan joldan ózdiginen óte almasyn bilgen turǵyndar arnaıy qyzmetterge qońyraý shalyp, kómek suraıdy.
Arhangelka aýylynyń ýchaskelik polıtsııa ınspektory Atyǵaı Temeshov jedel túrde qutqarý operatsııasyn uıymdastyrdy.
«Kólikter batqan jerge aýyldyq okrýg ákimi, jedel járdem kóliginiń júrgizýshileri jetti. Aıtýar aýylyna deıin toǵyz shaqyrym qalǵan eken. Batqan kólikterdi kúrekpen qardan arshyp shyǵardyq. Jedel járdem mashınasy jol bastap otyrdy. Oǵan deıin jol tazalaıtyn tehnıka jetip, turǵyndardy Aıtýar aýylynan Blagoveşenkaǵa deıin shyǵaryp saldy. Mundaı jaǵdaıda halyqtyń birligi baıqalady. Jurt qoldarynan kelgenshe kómektesýge tyrysady», - deıdi polıtsııanyń ýchaskelik ınspektory Atyǵaı Temeshov.
Esil aýdanynda tasjolda kezekshilik etip júrgen patrýldi polıtseıler qar qursaýynda qalǵan balyqshy men onyń 14 jastaǵy balasyna kómektesti. Balyq aýlaýǵa barǵan turǵyn aýa raıynyń buzylǵanyn baıqamaı qalǵan. Borannyń saldarynan Mitsubishi Pajero kóligimen ózdiginen kól basynan shyǵa almaǵan oǵan tártip saqshylary men jergilikti JShS kómekke kelip, mashınasyn qardan alyp shyqty.
