SQO-da polıtseılik laýazymdar 10% qysqardy
PETROPAVL. QazAqparat - Soltústik Qazaqstan oblysy jol-patrýldik polıtsııasynyń 200-den astam serjanty ofıtserlik quram qataryna aýystyryldy, dep habarlaıdy QazAqparat tilshisi.
Buryn sottalǵandar men shartty túrde bosatylǵan tulǵalarmen profılaktıkalyq jumys júrgizý máseleleri SQO Polıtsııa departamenti janyndaǵy Konsýltatıvtik-keńesshi organnyń kezekti otyrysynda sóz boldy. Konsýltatıvtik-keńesshi organnyń tóraǵasy Jasulan Ahmetov otyrys qatysýshylaryna oblystyq polıtsııa vedomstvosynyń bastyǵy Marat Tólebaevty tanystyryp, oǵan KKO múshesiniń kýáligin tabystady.
SQO PD baspasóz qyzmetiniń habarlaýynsha, otyrys qatysýshylary arasynda qyzý talqyǵa túsken taqyryp - sottalǵan, biraq qoǵamnan shettetilmegen tulǵalarmen jáne bas bostandyǵynan aıyrý oryndarynan bosatylǵandarmen profılaktıkalyq jumys júrgizý boldy.
«Jyl basynan 2 myńnan astam tekseris júrgizildi, onyń barysynda 58 buzýshylyq anyqtaldy. Bıylǵy jyly ýchaskelik polıtsııa ınspektorlarynyń usynymy boıynsha shartty túrde merziminen buryn bosatylǵan 22 tulǵa túrli buzýshylyqtar jasaǵany úshin túzetý mekemelerine qaıta qamaldy. Qazirgi ýaqytta polıtseılerdiń profılaktıkalyq esebinde shartty túrde merziminen buryn bosatylǵan - 440 adam, buryn aýyr jáne asa aýyr qylmys jasaǵany úshin sotty bolǵan 330 adam tur», - deıdi Jergilikti polıtsııa qyzmeti basqarmasynyń bastyǵy Aıdyn Baımatov.
Otyrysta jazasyn ótep shyqqandarǵa áleýmettik kómek kórsetý jáne beıimdeý máselesi kóterildi. Polıtseıler jáne qylmystyq-atqarý júıesiniń qyzmetkerleriniń aıtýynsha, olardyń jumyspen qamtylýy - eń tıimdi profılaktıkalyq shara bolyp tabylady.
Alaıda, tártip saqshylarynyń aıtýynsha, jumys berýshiler sottalǵan tulǵalardy jumysqa alýǵa nıet bildire qoımaıdy. Sondyqtan, bas bostandyǵynan aıyrý oryndarynan bosap shyqqandar, kóbinese kezdeısoq nápaqamen kún kórýdi jón sanaıdy. Qylmystyq-atqarý júıesi departamentiniń basshylyǵy olardy jumysqa májbúrlep ornalastyrý sharalaryn qabyldaý kezinde normatıvtik qujattarǵa súıený qajettiligin atap ótti.
Kezdesýde Polıtsııa departamentindegi laýazymdardy qysqartý máselesi de qozǵaldy. PD baspasóz qyzmetiniń málimetinshe, shtattyq birlik 281-ge azaıdy. Ońtaılandyrý maqsatynda orta býyn jetekshileri - bólimshe basshylary qysqartyldy. Sondaı-aq birneshe basqarma qosyldy. Al Jol-patrýldik polıtsııanyń 200 serjanty leıtenant shenin aldy.
