SQO-da polıtseılerdiń eki jańa statsıonarlyq beketi ashyldy
PETROPAVL. QazAqparat – Soltústik Qazaqstan oblysynda jańa jyl qarsańynda polıtseılerdiń eki statsıonarlyq beketi paıdalanýǵa berildi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńir basshysy Qumar Aqsaqalov polıtsııanyń keshendi kúshteriniń bıylǵy sońǵy garnızondyq taratýyna qatysty. SQO PD bastyǵy Marat Tólebaevpen birge qyzmettik avtokólikterdi kórip, oblys ortalyǵyndaǵy qoǵamdyq tártipti saqtaýǵa túsetin jeke quramǵa sáttilik tiledi.
«Bıylǵy jyl bárimiz úshin ońaıǵa soqpady, qoǵamdyq qaýipsizdikti saqtaǵan ishki ister organdarynyń qyzmetkerlerine alǵys bildiremin. Koronavırýs ınfektsııasymen kúres kezinde polıtseıler aldyńǵy shepte turyp, táýlik boıy qyzmet atqardy», - dedi oblys ákimi.
Іshki ister organdarynda minsiz qyzmet atqarǵany, qyzmette joǵary nátıjelerge qol jetkizgeni jáne jeke tártibi úshin birneshe polıtsııa qyzmetkeri marapattaldy.
Polıtseıler oblys ákimine Qazaqstan Konstıtýtsııasy kóshesinde ornalasqan modýldik úlgidegi jańa statsıonarlyq beketti kórsetti. Munda patrýldik, ıývenaldyq polıtsııa qyzmetkerleri men ýchaskelik ınspektor otyrady.
«Jumystyń servıstik modeline kóshe otyra, biz quqyqtyq tártipti qamtamasyz etý boıynsha mindettermen ǵana shektelmeımiz. Qoljetimdilik, shuǵyl, jedel áreket etý - halyqpen ózara is-qımyl jasaýdy qamtamasyz etýge múmkindik beredi. Mundaı zamanaýı beketter «halyqqa jaqyn polıtsııa» qaǵıdaty boıynsha jumys isteýdiń negizi», - deıdi polıtsııa vedomstvosynyń basshysy Marat Tólebaev.
Statsıonarlyq beketterde ishi-syrtyna táýlik boıy beınebaqylaý júrgiziledi. Kameralardaǵy beınejazbany Jedel basqarý ortalyǵy onlaın rejıminde kóre alady. Modýl zamanaýı talaptarǵa saı tehnıkalyq jabdyqtalǵan. Bólmede kompıýter, statsıonarlyq telefon jáne dabyl knopkasy, sonymen qatar, patrýldik polıtsııa qyzmetkeri men ýchaskelik polıtsııa ınspektorynyń qolynda beınetirkegishter men planshetter bar.
Beketter adamdar kóp júretin ortalyq saıabaqtyń kire berisine jáne «Sıtı-moll» saýda úıiniń mańynda ornalasqan.
