SQO-da polıtseıler júrgizýshilerdi jolda saq bolýǵa shaqyrdy
PETROPAVL. QazAqparat – Soltústik Qazaqstan oblysynda polıtseıler aýa raıynyń buzylýyna baılanysty kólik júrgizýshilerin jolda saq bolýǵa shaqyrdy, dep habarlaıdy QazAqparat tilshisi.
Elimizdiń soltústik óńirlerinde osy kezde qar erip jatyr. Túngi ýaqytta aýa temperatýrasynyń tómendeýinen joldardaǵy keıbir ýchaskelerde muz qatyp, jol qozǵalysyna qatysýshylardyń júrip-turýyn qıyndatady.
Sondaı-aq búgin SQO-da kún buzylyp, qar jaýdy. Osyǵan oraı óńir polıtseıleri kólik júrgizýshilerin eskertip, jol ústinde saq bolýǵa shaqyrdy.
«Júrgizýshiler jyldamdyq rejımin saqtaýy qajet. Alda kele jatqan kólikpen araqashyqty saqtaǵan jáne manevr jasaǵan kezde abaı bolǵan jón. Kóktaıǵaqtyń jaıaý júrginshiler úshin de qaýpi joǵary. Joldyń ruqsat etilmegen jerlerinen ótpeý kerek. Óıtkeni kólik júrgizýshisi baıqamaı qalýy ábden múmkin», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Sondaı-aq, polıtseıler sınoptıkter men tótenshe jaǵdaılar qyzmetiniń aýa raıynyń ózgeristeri jaıly eskertýlerine nazar aýdarýǵa keńes beredi. Alys saparǵa shyqpastan buryn, kóliktiń tehnıkalyq jaǵdaıynyń durys ekenine kóz jetkizý kerek. Jolda oqys jaǵdaıǵa tap bolǵan jaǵdaıda SQO PD Jergilikti polıtsııa qyzmeti basqarmasy kezekshi bóliminiń 8 7152 61-25-01, 49-32-47 telefondaryna nemese 102 arnasyna habarlasýǵa bolady.
Jyl basynan oblys aýmaǵynda 35 jol-kólik oqıǵasy tirkelip, saldarynan 11 adam qaıtys boldy, 50 adam jaraqattandy.
