SQO-da polıtseıler jol jaǵdaıyna baılanysty keshendi tekseris jumystaryn bastamaq

PETROPAVL. QazAqparat – Soltústik Qazaqstan oblysynda joldardy qardan durys tazalamaý derekteri boıynsha kommýnaldyq qyzmetterdiń 7 laýazym ıesi jaýapqa tartyldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, bıyl qysta Petropavl jáne oblys joldarynda 230-dan astam tekseris júrgizildi.

Joldy qardan durys tazalamaý faktileri boıynsha jaýapty memlekettik organdar men merdiger uıymdardyń basshylyǵyna 250-den astam uıǵarym joldandy. Olardy oryndamaǵany úshin jol uıymdarynyń basshylary, kommýnaldyq qyzmet ókilderi, ıaǵnı 7 laýazymdy tulǵa aıyppul tóledi.

«Búginde kóktemgi sý tasqynyna daıyndyq – jumystyń basym baǵyttarynyń biri. Joldardy sý shaımaýy úshin tasqynnan qorǵaýǵa múmkindik beretin sý ótkizgishterdiń taza bolýyna baqylaý júrgizemiz. Oblystyq jáne respýblıkalyq mańyzy bar avtomobıl joldarynda barlyǵy 1185 sý ótkizgish ornalasqan. Onyń 792-i búgingi kúnge deıin tazartyldy», - deıdi SQO PD ÁPB bastyǵy Jasulan Ospanov.

Tártip saqshylary Petropavldaǵy joldardyń tazalyǵyn, shatyrlardyń qardan jáne muzdan taza bolýyn da qadaǵalaıdy. Oblys ortalyǵynda osy maqsatta ýchaskelik ınspektorlar 12 reıdtik is-shara júrgizdi. Abattandyrý erejelerin elemegen 372 adamǵa eskertý jasaldy, erejeni qaıta buzǵany úshin 29 aıyppul salyndy.

Ákimshilik polıtsııa basqarmasy qyzmetkerleri jaqynda SQO aýmaǵyndaǵy joldarǵa kóktemgi keshendi tekseris jumystaryn bastaıdy. Jol jaǵdaıy, jol ınfraqurylymynyń barlyq elementteri tekseriledi. Tekseris nátıjeleri boıynsha jergilikti atqarýshy organdarǵa joldardyń sapasyn jaqsartý boıynsha birqatar usynystar joldanbaq.