SQO-da polıtseıler jańa úlgidegi formamen shyqty
PETROPAVL. QazAqparat – Soltústik Qazaqstan oblysynda polıtseıler qyzmettik kıimderin jańa úlgidegi formaǵa aýystyrdy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavldyń patrýldik polıtseıleri jáne ýchaskelik polıtsııa ınspektorlary jaryq shaǵylystyrlǵysh elementteri bar, yńǵaıly etip tigilgen, erekshelik belgileri bar kók nysandy kıimde qyzmet atqarady.
Jańa úlgidegi forma polıtseılerdiń kúndelikti jumysynda kezdesetin ádetten tys jaǵdaılarda is-qımyl jasaýyna barynshy yńǵaıly etip tigilgen. Bashlyǵy jáne jaryq shaǵylystyrlǵysh elementteri bar ashyq tústi keýdesheler, ásirese túnde óte yńǵaıly. Jańa úlgidegi kıim-keshek búgingi kúni Petropavldyń patrýldik polıtsııa ınspektorlaryna jáne ýchaskelik polıtsııa ınspektorlaryna, sondaı-aq birqatar aýdandardaǵy bólinis qyzmetkerlerine berildi. Jańa formany kezeń-kezeńmen oblystaǵy ıývenaldyq polıtseıler de alady.
«Polıtseılerge arnalǵan jańa forma – ishki ister organdaryn jetildirý boıynsha Jol kartasy tarmaqtarynyń biri. Memleket basshysynyń tapsyrmasy boıynsha barlyq qyzmet «servıstik modelge» negizdelgen. Patrýldik polıtseıler men ýchaskelik ınspektorlar halyqpen tyǵyz baılanysta jumys isteıdi. Sondaı-aq bul bólinis qyzmetkerleri táýlik boıy, kez kelgen aýa raıy jaǵdaıynda jáne dalada qyzmet atqarady: oqıǵa oryndaryna, jol apattaryna, quqyq buzýshylyqqa alǵashqylardyń biri bolyp jetedi, sondaı-aq basqa da shuǵyl shaqyrtýlarǵa barady. Jańa forma jedel-qyzmettik tapsyrmalardy shuǵyl ári kásibı oryndaýǵa yńǵaıly», - deıdi SQO PD bastyǵynyń birinshi orynbasary Qanat Aıtbaev.
Petropavl qalalyq polıtsııa basqarmasynyń patrýldik polıtsııa batalony jyl basynan izin sýytpaı 30-dan astam qylmystyń betin ashty. Jol qozǵalysy erejelerin buzýdyń 4 myńnan astam deregin anyqtap, 30-dan astam mas júrgizýshini ustady.
