SQO-da polıtseıler jalǵyzilikti qarttardyń aýlalaryn qardan tazartýǵa kómektesip jatyr
PETROPAVL. QazAqparat – Soltústik Qazaqstan oblysynda polıtseıler soǵys jáne polıtsııa qyzmetiniń ardagerlerine, tyl eńbekkerlerine, jalǵyzilikti zeınetkerlerge baryp kómek kórsetti, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler Naýryz meıramyn ıgi ister jasap qarsy alýda. Mereke qarsańynda tártip saqshylary soǵys jáne polıtsııa qyzmetiniń ardagerlerine, tyl eńbekkerlerine, jalǵyzilikti zeınetkerlerge bardy. Olardyń aýlalarynan qar shyǵaryp, otyn tasyp berdi. Azyq-túlik ákelip, úılerin jınady.
78 jastaǵy M. Jumabaev aýdanynyń turǵyny Tamara Doldına temirjolda telefonıst bolyp eńbek etti. Onyń jary Fedor Dmıtrıevıch soǵys kezinde kolhozda jumys istegen, Jeńiske qosqan úlesi úshin «1941-1945j. Uly Otan soǵysyndaǵy eren eńbegi úshin» medalimen marapattalǵan. Bul otbasyǵa polıtseıler birneshe jyldan beri kómektesip keledi. Búgin de aýlany qardan tazartty, al aýdandyq polıtsııa bóliminiń medbıkesi olardyń qan qysymyn ólshem, jaǵdaılaryn bildi. Rıza bolǵan zeınetker qonaqtarǵa fotoalbomdy kórsetip, óz ómiri týraly aıtyp berdi.
Aıdaýyldaý qyzmeti vzvodynyń qyzmetkerleri qoldaryna kúrek alyp, Petropavlda turatyn ІІM zeınetkeri Sáken Baketovke baryp qaıtty.
Qyzyljar aýdany polıtsııa bóliminiń qyzmetkerleri aýdan ortalyǵy Beskólde turatyn jalǵyzilikti zeınetker 86 jastaǵy Vera Vlachenkoǵa bardy. Vera Ivanovna – tyń ıgerýshi, tyń ıgergeni úshin 6 ret marapattalǵan eken. Beskólde 1968 jyldan turady, 27 jyl kóshpeli mehanıkalandyrylǵan kolonnada jumys istegen. Qyzyljarlyq polıtseıler keıýanaǵa azyq-túlik aparyp, úıdiń mańyn qalyń qardan tazartty. Aýdan polıtseıleri polıtsııa vedomstvosynyń ardagerlerin polıtsııa bóliminiń akti zalynda quttyqtady. Urpaqtar arasyndaǵy baılanys ta umyt qalǵan joq: ishki ister organdary zeınetkerlerimen kezdesýge «Parasat» mektep-lıtseıiniń jáne №2 orta mektep oqýshylary shaqyryldy. Balalar aýdandyq polıtsııanyń mýzeıine bardy, ІІO ardageri Aleksandr Klopov qylmys oryndarynda zattaı dáleldemelerdi izdestirýmen jáne zertteýmen aınalysatyn pogondaǵy ǵalymdar dep atalyp ketken krımınalıst mamandardyń qıyn da qyzyqty jumysy týraly aıtyp berdi.
««Igi ister kúni» barlyq aýdandyq polıtsııa de jáne Petropavl qalalyq basqarmasynda ótti. 30-dan asa adamǵa kómek kórsetildi. Negizgi kóktem merekesi qarsańynda bastaý alǵan qaıyrymdylyq marafony aldaǵy ýaqytta ta jalǵasady. Polıtseıler vedomstvonyń ardagerleri, tyl men maıdan erleri, az qamtylǵan otbasylarǵa tek mereke kúnderi ǵana qamqorlyq kórsetpeıdi. Qart adamdarǵa qamqor bolý – ashyq aspan men beıbit ómir syılaǵan, óńirdiń gúldenýine úles qosqan aǵa býynǵa rızashylyq bildirý dep bilemin», - deıdi SQO Polıtsııa departamentiniń bastyǵy Marat Tólebaev.
