SQO-da polıtseıler urylarǵa jem bolmaý joldaryn kórsetti
PETROPAVL. QazAqparat – Soltústik Qazaqstan oblysynda tártip saqshylary qalta urylarymen kúresti myqtap qolǵa alyp, tipti turǵyndarǵa urylarǵa jem bolmaýdyń amaldaryn kórsetetin usynym ázirledi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, jyl basynan qalta urlyǵyna qatysty 15 qylmystyq is qozǵalǵan. Onyń 8-inde is sotqa deıin jetti.
Qalta urysynan saqtaný úshin birneshe usynymdy esten shyǵarmaǵan jón. Ony soltústikqazaqstandyq polıtseıler kóp jylǵy tájirbıege súıene otyryp jazyp shyqty. Aqyl-keńes jáne krımınaldy polıtsııa bólimsheleriniń telefon nómirleri jazylǵan bannerler halyq kóp júretin jerlerge ilinip jatyr.
«Qalta urysyn bet-beınesine, kıim kıisine qarap ajyratý múmkin emes. Olar basqalardan erekshelenbeýge tyrysady. Juppen jáne jalǵyz jumys isteýleri múmkin. Ádette qoǵamdyq kólikterde tańerteń nemese jurt úıine qaıtar ýaqytta júredi. Sol sebepti qalta urlyǵynyń aldyn alý úshin bannerlerdi aıaldamalardyń janyna ilip jatyrmyz», - deıdi tártip saqshylary.
Petropavl turǵyndary polıtseılerdiń bastamasyna oń baǵalaryn berýde.
«Kózge kóringen nárse jaqsy este qalady. Bannerlerdegi aqyl-keńester bireýine bolmasa bireýine kómektesedi. Avtobýsty kútken jurt mindetti túrde oqıdy. Qajet aqparat», - deıdi Petropavl qalasynyń turǵyny Svetlana Nasyrova.
Krımınaldy polıtsııa basqarmasynyń málimetinshe, Petropavl qalasynda mundaı bannerlerdiń jıyrmaǵa jýyǵy ilinbek. Budan basqa aıaldamalarǵa ınternet-alaıaqtyqqa qatysty da aqparat japsyryldy. Avtobýs salondarynda jolaýshylardy eskertken aýdıorolıkter júredi.
