SQO-da polıtseıler sý tasqyny kezinde tonaýshylyqtarǵa jol bermeıdi
PETROPAVL. QazAqparat - Soltústikqazaqstandyq tártip saqshylary sý tasqynyna qarsy is-sharalardy qolǵa aldy, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń habarlaýynsha, polıtsııa bastyǵy Berik Bilálov aýdandyq polıtsııa bólimderiniń jeke quramymen kezdesti. Kún tártibindegi másele - sý tasqynyna qarsy is-sharalarǵa daıyndyq.
Oblystyq polıtsııa vedomstvosynyń bastyǵy aýdandyq polıtseılerge sý tasqynyn únemi baqylap otyrýdy tapsyrdy. Bul rette ýchaskelik polıtsııa ınspektorlaryna úlken mindet júkteledi. Olar ózderi qyzmet kórsetetin ýchaskelerdegi bolyp jatqan barlyq ózgerister týraly shuǵyl túrde kezekshi bólim men tótenshe jaǵdaılar qyzmetkerlerine habar berip, quqyq buzýshylyqtar men tonaýshylyqtarǵa jol bermeýleri qajet. Berik Bilálov ótken jyldardaǵy bolǵan sý basý kezindegi sııaqty bıylǵy jyly da polıtsııa qyzmetkerleri alǵy shepte bolyp, turǵyndar men jergilikti atqarýshy organdarǵa jan-jaqty kómek kórsetýleri tıis ekendigin aıtty.
Tótenshe jaǵdaılardy joıý úshin oblys polıtseıleri júrý baǵyttarynyń syzbasyn, kúsh pen quraldardyń sanyn naqtylap, habarlaý júıesin tekserýde. Jyl basynan joldardyń jaǵdaıyna 291 tekseris júrgizilip, anyqtalǵan kemshilikterdi joıý úshin 286 nusqama berilgen.
«Tasqyn sýǵa qarsy is-sharalar aýdandarda ǵana emes, oblys ortalyǵynda da júrgizilýde. Qazirgi ýaqytta tabıǵı jáne tehnogendik sıpattaǵy tótenshe jaǵdaılar oryn alǵanda halyqty arnaıy dybys zoraıtqysh qurylǵy arqyly habardar etýge arnalǵan qajetti aqparat barlyq patrýldik avtokólikterge berilgen. Patrýldik polıtsııanyń statsıonarlyq jáne jyljymaly beketterinde jol qozǵalysyna qatysýshylardan kóktemgi tasqyn kezinde adamdarǵa qaýip týǵyzatyn joldardyń buzylýy, basqa da ózgerister suralady», - deıdi baspasóz qyzmetiniń mamandary.
SQO-nyń Ýálıhanov aýdanynda tasqyn sýmen kúresý úshin oblys ákimi Qumar Aqsaqalovtyń jetekshiligimen jedel shtab quryldy. Qazir bul aýdanda óńirdiń qutqarýshylarynan bólek Nur-Sultan qalasynyń jáne Pavlodar oblysynyń mamandary jumys istep jatyr.
